Ubwandu bwa Covid-19 bukomeje gutumbagira muri USA

Yanditswe na Uwimana Abraham
Kuya 16 Ugushyingo 2020 saa 01:22
Yasuwe :
0 0

Ubwandu bwa Coronavirus muri Leta Zunze Ubumwe za Amerika bukomeje gutumbagira cyane buri munsi aho ubu umubare w’abanduye iki cyorezo urenga abantu miliyoni 11, naho abandura ku munsi bakaba barenga 100.000.

Kuri ubu muri USA, impuzandengo y’abari guhitanwa na Covid-19 ku munsi, ni abantu 900, abahitanywe nayo kuri ubu bagera ku 246.210.

Nyuma y’uko ubwandu bukomeje kwiyongera cyane, zimwe muri leta zahisemo gukaza ingamba z’ubwirinzi ubwazo mu kwirinda ikwirakwira ry’iki cyorezo.

Muri leta zahise zifata ingamba zikomeye, harimo Leta ya Michigan ndetse na Washington zashyizeho ingamba zikomeye mu rwego rwo guhashya ikwirakwira ry’iki cyorezo.

Zimwe mu ngamba zashyizweho zirimo ko amashuri yose, yaba ayisumbuye ndetse na kaminuza arekeraho kwigishiriza ku bigo, restaurant nazo ntizizaba zemerewe kwakira abaziriramo guhera ku wa gatatu, inzu z’imyidagaduro, izikorerwamo siporo, n’inzu ndangamurage nazo zizafunga muri Washington.

Ubutegetsi bwa Trump ku wa gatanu bwatangaje ko mu Ukuboza buteganya gukwirakwiza miliyoni 20 z’urukingo rwemejwe, n’ubwo uru rukingo rutaremerwa byemewe n’amategeko.

Ubitegetsi bwa Trump kandi bwakomeje kwanga gusubiza igihugu muri Guma mu Rugo, gusa kuri ubu kuko ubwandu bukomeje kwiyongera, leta zimwe na zimwe zahisemo kwifatira ingamba zazo.

Leta ya Washington n’iya Michigan zifashe ingamba nyuma y’uko ubwandu bwa Covid-19 bukomeje kwikuba kuva mu byumweru bishize, Guverineri wa Michigan, Gretchen Whitmer, yavuze ko mu gihe nta gikozwe mu maguru mashya, iyi Leta ishobora guhura n’ibibazo birimo ko Covid-19 yajya ihitana abarenga 1000 buri cyumweru.

Muri Washington, ingamba zashyizweho ziratangira gukurikizwa kuri uyu wa mbere, zimare ukwezi.

Guverineri Jay Inslee, ku wa 15 Ugushyingo 2020, yagize ati “Uyu munsi ni umwe mu minsi ihangayikishije ubuzima kuva mu gihe cy’imyaka 100 ishize mu mateka.”

Yongeyeho ati “Icyorezo gikomeje kwiyongera muri leta yacu, hatagize igikorwa, bishobora gutuma ibitaro byuzura abarwayi n’abapfa abakiyongera, hakenewe ko abantu bava mu bisanzwe bagakaza ingamba zo kwirinda Covid-19.”

Izindi leta nazo zagiye zishyiraho ingamba zitandukanye nyuma yo kubona ko ubwiyongere bw;ubwandu bukomeje gukaza umurego.

Leta ya Oregon n’iya New Mexico ku wa gatandatu nibwo zashyizeho ingamba zikaze.

Leta ya California ku wa gatanu yabaye iya kabiri yari igize ubwandu bw’abantu barenga miliyoni, nyuma ya Texas, bikaba byaratumye ibikorwa byari bitaremererwa gukora biba bikomeje gufungwa.

Ba-Guverineri muri Iowa, Ohio, West Virginia, Utah ndetse na North Dakota, bashyizeho itegeko ryo guta muri yombi utambaye agapfukamunwa.

Guverineri wa Ohio yavuze ko azafunga utubari n’inzu zikorerwamo siporo, ubwandu nibukomeza kwiyongera. Muri Leta ya Minesota, utubari tugomba gufunga saa 22:00.

Muri Wisconsin na Nevada, abaturage basabwe kuguma mu rugo mu gihe cy’ibyumweru bibiri, mu rwego rwo kwirinda ko hasubizwaho ingamba zikarishye.

Ba-Guverineri bo muri California, Oregon ndetse na Washington bashyizeho amabwiriza y’uko ushaka gukora urugendo abanza kubisabira uruhushya, ndetse akabanza akishyira mu kato nyuma y’urugendo.

New York yasabye utubari ducuruza ibisindisha ko tugomba kujya kuba twafunze bitarenze 22:00, ndetse n’imihuro ntigomba kurenza abantu 10, amashuri nayo arafungwa kuri uyu wa mbere.

Umujyi wa Chicago nawo wagiriye inama abantu kuguma mu rugo n’ubucuruzi butari ubw’ingenzi bugomba kujya bufunga saa 23:00, n’amahuriro y’abantu ntarenze abantu 10.

Umujyi wa Detroit wohereje abanyeshuri bose kwigira ku ikoranabuhanga badahura imbona nkubone na mwarimu ku bwo kwiyongera kw’icyorezo.

Maryland yasabye restaurant kujya zakira abantu batarenze 50% y’abo ishobora kwakira.

Kugeza ubu kuva Coronavirus yagera muri Leta Zunze Ubumwe za Amerika, abamaze kwandura bararenga miliyoni 11, naho abamaze guhitanywa nayo barenga ibihumbi 246.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .