Hagaragajwe ko guterember ari cyo kintu cyifuzwa cyane nyuma ya Coronavirus

Yanditswe na Ndahayo Emmanuel
Kuya 28 Gashyantare 2021 saa 05:24
Yasuwe :
0 0

Nta gushidikanya ko nyuma y’umwaka wose Coronavirus imaze izonga abatuye Isi, abantu hirya no hino bamaze kuyihaga. Mu bikumbuwe byose, gutembera ni kimwe mu by’ibanze byifuzwa na benshi.

Mu bushakashatsi bwakozwe n’ikigo Trivago, bwagaragaje ko Abanyamerika bamaze kurambirwa kugumishwa mu ngo zabo, ku buryo biteguye gukora ibishoboka byose, ariko bakongera gusubizwa amahirwe yo kwinyagambura, bakazunguruka Isi batembera.

Ubu bushakashatsi bwerekanye ko 80% by’Abanyamerika basubije, bavuze ko gutembera ari kimwe mu bigize ubuzima bwiza, ku buryo kuba byarahagaritswe mu rwego rwo kwirinda ikwirakwira rya Coronavirus, byahungabanyije ubuzima bwabo mu buryo bukomeye.

Mu basubije, 48% bavuze ko bifuza gutembera cyane ku buryo n’iyo byasaba kureka akazi bari gukora uyu munsi, bakareka ariko bakongera bagatembera nk’uko byahoze mbere ya Coronavirus.

Mu bandi basubije, 38% mu basubije bavuga ko bareka gukora imibonano mpuzabitsina mu gihe cy’umwaka wose ariko bakongera gutembera.

Umwe mu bantu bane basubije kandi yavuze ko yakwemera guhara ubwizigame bwe, ariko akongera gutembera, mu gihe umwe muri batanu yavuze ko yareka umukunzi we, igihe byamusubiza amahirwe yo kwirekura agatembera.

CNBC yavuze ko iyi mibare igaragaza uburyo abantu bamaze kurambirwa cyane ibyo kuguma mu rugo, bakaba basigaye bifuza gutembera ku rwego rwo hejuru.

Kugira ngo Abanyamerika bongere gutembera, igihugu cyabo kiri gukora ibishoboka byose kugira ngo bobone inkingo bifuza. Mu kwezi gutaha kwa Werurwe, byitezwe ko inganda za Moderna na Pfizer zizakuba kabiri inkingo zikora ku kwezi.

Moderna yavuze ko mu kwezi gutaha izakora inkingo miliyoni 40, mu gihe Pfizer yiteguye gukora inkingo miliyoni 120, mu gihe uruganda rwa Johnson&Johnson rwiteguye kuzakora inkingo miliyoni 20.

Izo nkingo kimwe n’izindi zitandukanye, zizatuma Amerika ibona inkingo miliyoni 240 zizakingira abantu miliyoni 130, bigatuma icyorezo cya Coronavirus gicika intege ku rwego rukomeye muri Amerika, dore ko ari na cyo gihugu kimaze gupfusha abantu benshi ku Isi bazize Coronavirus, barenga 500 000.

Bamwe mu bakurikiranira ibintu hafi bemeza ko kuba Amerika iri gukingira abantu vuba, ari byiza ku rwego rw’Isi kuko bizatuma umunsi icyo gihugu cyarangije gukingira abenegihugu, inganda zacyo ari na zo ziri gukora inkingo zizatangira gukwirakwiza inkingo ku rwego rw’Isi, bityo icyorezo cya Coronavirus kikaranduka vuba.

Abantu banyotewe no kongera gutembera/: FY!S

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .