Ubukungu bw’u Bushinwa bwazamutse ku kigero gito bwa mbere mu myaka 29

Yanditswe na IGIHE
Kuya 17 Mutarama 2020 saa 10:19
Yasuwe :
0 0

Ubukungu bw’u Bushinwa bwazamutseho 6.1% mu 2019, bikaba ari bwo bwa mbere buzamutse ku gipimo gito mu myaka 29 ishize nubwo bwageze ku ntego yari yiyemejwe yo kuzamuka hagati ya 6% na 6.5%.

Abasesenguzi bagaragaza ko kuba iki gipimo cy’izamuka ry’ubukungu cyamanutse kivuye kuri 6.6% mu 2018, byatewe ahanini n’intambara y’ubukungu hagati y’u Bushinwa na Amerika.

Bavuga kandi ko iyi mibare yatangajwe n’Ikigo cy’Ibarurishamibare cy’u Bushinwa yerekana igitutu ku bukungu bw’u Bushinwa, bitewe ahanini n’izamuka ry’ubushomeri, ibibazo mu bijyanye n’urwego rw’imari.

Kuva mu 1990, ni ubwa mbere ubukungu bwazamuka ku kigero gito kuko byaherukaga muri uwo mwaka ubwo bwazamukaga ku kigero cya 3.9%.

Mu gihembwe cya kane cy’umwaka ushize, umusaruro mbumbe w’u Bushinwa wazamutse ku kigero cya 6%. Umusaruro w’inganda ari wo uyoboye ubukungu bw’u Bushinwa, wazamutseho 5.7% umwaka ushize, bikaba byaragenze uko byari biteganyijwe ariko na none bisubira inyuma ugereranyije na 6.2% mu 2018.

Ikigero cy’amafaranga abaturage bagura ibyo bakeneye cyaragabanyutse kigero cya 8% umwaka ushize kivuye ku 9% mu 2018.

Ikigero cy’izamuka ry’abaturage mu Bushinwa kandi cyaragabanyutse kigera kuri 1.05% mu 2019, bikaba ari ikimenyetso cy’uko bushobora kuzahura n’ikibazo cyo kutagira abantu bakiri bato bashobora gukora ngo izamuka ry’ubukungu rikomeze kwiyongera mu myaka 20 iri imbere.

Visi Perezida wa mbere w’u Bushinwa, Liu He, avuga ko iyi mibare ari myiza kandi hari icyizere ko muri uyu mwaka ubukungu bw’igihugu cye buzazamuka cyane.

Uyu muyobozi wari i Washington aho yasinyaga amasezerano ya mbere mu by’ubucuruzi na Amerika, yavuze ko u Bushinwa budakoresha cyane inguzanyo kandi bushyize imbere gukomeza kuyoborwa na gahunda yo guhanga udushya.

Icyegeranyo cya banki mpuzamahanga ikomoka mu Bwongereza [Standard Chartered] kigaragaza ko mu 2030, ubukungu bw’u Bushinwa buzaba bungana na miliyari ibihumbi 64.2 by’amadolari ya Amerika kandi buri ku muvuduko w’ubwiyongere bwa 5%.

U Bushinwa buri ku mwanya wa kabiri mu bihugu bikize, mu 2030 buzaba ari ubwa mbere bukurikiwe n’u Buhinde, naho Leta Zunze Ubumwe za Amerika ziri ku mwanya wa gatatu.

Amerika izatakaza umwanya wa mbere bitewe no kugabanuka k’ubushobozi bwo kugura ku isoko, ndetse n’ingano y’ibikorerwa imbere mu gihugu. Ubukungu bwa Amerika buzaba bungana na miliyari ibihumbi 31 by’amadolari ya Amerika.

Ubukungu bw'u Bushinwa bwazamutse kuri 6.1% mu 2019

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .