Ubukungu bw’u Bushinwa bukomeje kuba umutamenwa kuri Covid-19, bwazamutseho 4.9%

Yanditswe na Bukuru JC
Kuya 19 Ukwakira 2020 saa 11:55
Yasuwe :
0 0

Imibare y’Ikigo cy’Ibarurishamibare mu Bushinwa ikomeje kugaragaza ko iki gihugu kigenda kigobotora ingaruka za Covid-19 ku bukungu bwacyo, aho ubukungu bw’iki gihugu kuva muri Nyakanga kugeza muri Nzeri bwazamutse ku kigero cya 4.9%.

Ibi u Bushinwa buri kubigezeho mu gihe ubwo iki gihugu cyari kizahajwe n’iki cyorezo mu ntangiriro za 2020, ubukungu bwacyo abantu batangiye kububona nk’uburi mu kangaratete kubera ubwinshi bw’ibigo by’ubucuruzi byafungaga imiryango.

Iyi mibare yashyizwe hanze kuri uyu wa mbere, igaragaza ko muri iki gihembwe cya gatatu cya 2020, iki gihugu kigenda kirushaho kuzamura ubukungu bwacyo ugereranyije n’ibindi bihembwe aho cyari cyibasiwe n’icyorezo cya Covid-19.

Ni imibare itangaza icyizere k’ukuzanzahuka k’ubukungu bw’u Bushinwa kuko mu gihembwe cya kabiri (kuva muri Mata kugeza Kamena) ubukungu bw’iki gihugu bwari bwazamutse ku kigero cya 3.2%, bivuze ko uyu muvuduko wiyongereye ku kigero cya 1.7%.

Iyi mibare igaragaza ko muri Nzeri urwego rw’inganda rw’u Bushinwa rwazamutse ku kigero cya 6.9% mu gihe ibikorwa by’amaduka agurisha ibicuruzwa bigiye gukoreshwa n’abakiliya ako kanya byo byazamutse ku kigero cya 3.3%.

Ikigo cy’Ibarurishamibare mu Bushinwa cyagaragaje kandi ko ibyo iki igihugu cyohereje hanze muri Nzeri ugereranyije n’umwaka ushize byazamutse ku kigero cya 9.9%, mu gihe muri Kanama byari byazamutse ku kigero cya 9.4%.

Inzobere mu by’ubukungu zivuga ko uku kuzamuka kw’ibyo u Bushinwa bwohereza mu mahanga bubikesha kuba muri aya mezi ibikoresho bukora byifashishwa n’abaganga mu kwirinda Covid-19 birimo imyambaro yabo n’uturinda ntoki byakenewe cyane ku isoko. Uretse ibi bikoresho ngo hari n’imiti bukora muri iki gihe yarushijeho gukenerwa cyane ku Isoko.

Urundi rwego rwazamutse ni urujyanye na serivisi rwazamutse ku kigero cya 4.3% mu gihe mu gihembwe cyari cyabanje (kuva muri Mata kugera Kamena) rwari rwazamutse ku kigero cya 1.9%.

Iyi mibare igaragaza kandi ko muri Nzeri ikigero cy’ubushomeri mu Bushinwa cyamanutse kiva kuri 5.6% cyariho muri Kanama kigera kuri 5.6%.

Impuguke mu by’ubukungu zivuga ko ubukungu bw’iki gihugu buzakomeza kuzamuka no mu mezi ari imbere aho mu gihembwe cya kane buteganyijwe kuzamuka ku kigero cya 5.5%, igihembwe cya mbere cya 2021 bukazamuka ku kigero cya 15%, umwaka wose wa 2021 ukazarangira buzamutse ku kigero cya 8.5%.

Mu gihembwe cya gatatu cya 2020 ubukungu bw'u Bushinwa bwazamutse ku kigero cya 4.9%

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .