00:00:00 IGIHE NETWORK KN KINYARWANDA EN ENGLISH FR FRANCAIS

U Bwongereza buri mu ihurizo ry’abaganga n’abaforomo badahagije

Yanditswe na IGIHE
Kuya 5 Mutarama 2023 saa 08:40
Yasuwe :

Urwego rw’ubuzima mu Bwongereza ruri mu bibazo bikomeye cyane byo kubura abaganga n’abaforomo ndetse no gutegereza igihe kirekire imodoka zitwara indembe bigatuma abaturage benshi bahatakariza ubuzima.

Perezida w’ishyirahamwe ry’abaganga bita ku ndembe mu Bwongereza, Adrian Boyle, yatangaje ko nibura abantu bari hagati ya 300 na 500 bapfa buri cyumweru kubera kudahabwa ubuvuzi bwihuse baba bakeneye.

Ni imibare ariko iri shyirahamwe ritavugaho rumwe na Leta. Minisitiri w’Intebe w’u Bwongereza, Rishi Sunak, yemeje ko yumvise abaturage bitotombera serivisi z’ubuvuzi by’umwihariko kubona imodoka zitwara indembe cyangwa gutegereza imyaka kugira ngo umuntu abagwe.

Yemeje ko biteye inkeke ariko yizeza ko iki kibazo kizakemurwa no gushaka abaforomo benshi, abaganga n’abandi batanga serivisi zo kwita ku bantu n’ibitanda byo kwa muganga bikiyongeraho 7000.

Ku rundi ruhande ariko guverinoma ye igomba guhangana n’ikibazo cy’umushahara w’abaforomo n’abashinzwe imodoka zitwara indembe.

Hakenewe nibura abaforomo ibihumbi 50 aho abagera ku bihumbi 25 bagomba guhabwa akazi baturutse mu bindi bihugu kuko u Bwongereza budashobora kwigisha abakenewe bose cyangwa ngo bubashe kureshya abenegihugu gukora aka kazi kubera umushahara muke.

Umuyobozi w’ishyirahamwe ry’abakora mu buvuzi mu Bwongereza, Phil Banfield, aherutse gutangaza ko abona urwego rw’ubuzima rujegajega. Ibi ngo byatewe n’igitutu cya Covid-19, imyigaragambyo y’abaforomo n’abashinzwe imodoka zitwara indembe batishimiye umushahara bahabwa ndetse no kuba leta yaragabanyije ingengo y’imari yashyirwaga mu buvuzi.

Urwego rw’ubuzima mu Bwongereza kandi rufite ikibazo cy’ibitanda byo kwa muganga kuko usanga biriho abarwayi ku kigero cya 94%, bitewe no kunanirwa kohereza aborohewe ahandi nko mu ngo kuko nta bakozi bo kubitaho bahari. Muri iki cyiciro hakenewe abakozi ibihumbi 165.

Gahunda ya Brexit kandi yabaye imbogamizi ku baforomo bo mu bihugu by’i Burayi bashaka kujya gukorera mu Bwongereza.

Minisitiri w'Intebe w'u Bwongereza, Rishi Sunak yemeje ibibazo biri mu rwego rw'ubuzima biteye impungenge

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .