00:00:00 IGIHE NETWORK KN KINYARWANDA EN ENGLISH FR FRANCAIS

U Bwongereza: Abahawe inkingo ebyiri za Covid-19 muri Amerika n’i Burayi bakomorewe ingendo

Yanditswe na Muhonzire Sylvine
Kuya 2 Kanama 2021 saa 11:50
Yasuwe :
0 0

Ubu abaturage bahawe inkingo ebyiri za Covid-19 batuye muri Leta Zunze Ubumwe za Amerika n’abatuye mu bihugu biri mu muryango w’Ubumwe bw’u Burayi [EU] havuyemo u Bufaransa, bemerewe kwinjira mu Bwongereza bagasura imiryango yabo cyangwa bagatembera aho bashaka batabanje kujya mu kato.

Gusa uwahawe inkingo ebyiri uturuka mu bihugu byashyizwe mu mutuku n’u Bwongereza harimo n’u Rwanda, ntiyemerewe kugira aho ajya atabanje kumara iminsi icumi mu kato n’iyo yaba atarwaye Covid-19.

Buri byumweru bitatu hakorwa urutonde rw’ibihugu abaturage babyo bemerewe kujya mu Bwongereza hagendewe ku bwandu bwa Covid-19 bifite, aho ibirimo ubwandu buke bishyirwa mu Cyatsi, ibirimo ubwandu budakabije bigashyirwa mu Muhondo mu gihe ibirimo ubwandu bwinshi bishyirwa mu Mutuku.

Umuntu wese wakingiwe inkingo ebyiri uvuye mu bihugu biri mu cyatsi no mu muhondo yemerewe kwinjira muri iki gihugu atiriwe ajya mu kato, ariko akipimisha Coronavirus mbere yuko akora urugendo na nyuma y’iminsi ibiri ageze mu Bwongereza, gusa utarakingiwe cyangwa uwahawe rumwe ajya mu kato k’iminsi icumi.

Abo mu bihugu byashyizwe mu mutuku niyo baba barakingiwe inkingo ebyiri, bagomba kwipimisha mbere y’urugendo na nyuma yarwo ndetse bakajya mu kato k’iminsi icumi muri hoteli zateganyijwe aho kujya mu rugo.

Gusa aya mategeko ashyirwa ku bihugu hagendewe k’urugero bw’ubwandu bifite ntavugwaho rumwe muri iki gihugu, aho abashinzwe ingendo bavuga ko iki gihugu kidakwiye kugira ubwoba bw’abagenzi baza, ahubwo bose bagahabwa uburenganzira bungana kugira ngo ubukungu buzahuke.

Ibihugu bigera kuri 60 ku Isi hose byashyizwe mu mutuku n’u Bwongereza, aho 21 muri ibyo ari ibyo muri Afurika, ibindi ni ibyo muri Aziya ndetse n’Amerika y’Amajyepfo.

Nubwo ariko abavuye muri Amerika bemerewe kujya mu Bwongereza bisanzuye, muri Amerika ho imipaka iracyafunze ku muturage wese uvuye mu Bwongereza cyereka gusa ku Munyamerika, kuko iki gihugu nubwo gifite abaturage benshi bakingiwe ariko kirimo ubwandu bwinshi bwa Covid-19.

Ku Cyumweru tariki 1 Kanama 2021, habonetse abarwayi bashya bagera ku 24 470, abagera kuri 65 bahitanwa na Covid-19. Gusa 72.5% by’abantu bafite imyaka y’ubukure bose bahawe inkingo ebyiri za Covid-19 ndetse zikaba ziri gutanga icyizere ku igabanuka ry’ubwandu bw’iki cyorezo.

Abavuye Amerika n'i Burayi bahawe inkingo ebyiri za Covid-19 ubu bemerewe kujya mu Bwongereza bagatembera batiriwe bajya mu kato

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .