U Bushinwa bwashyize bwemerera OMS gukora iperereza ku nkomoko ya COVID-19

Yanditswe na Muhonzire Sylvine
Kuya 17 Ukuboza 2020 saa 01:08
Yasuwe :
0 0

Itsinda ry’abashakashatsi rigizwe n’abantu icumi riturutse mu Ishami ry’Umuryango w’Abibumbye ryita ku buzima, OMS, byitezwe ko rizajya mu mujyi wa Wuhan mu ntangiriro z’umwaka utaha gukora iperereza ku nkomoko ya COVID-19.

Kuva iki cyorezo cyatera mu mpera z’umwaka ushize wa 2019 mu ntara ya Hubei mu mu mujyi wa Wuhan, u Bushinwa bwagiye bwanga ko hakorwa iperereza ryimbitse ry’aho iyi ndwara yaturutse, ndetse habayeho ibiganiro byatwaye igihe kinini kugira ngo bwemerere OMS gukora iperereza kuri iyi virus.

Iyi virus bivugwa ko yaba yarakomotse mu binyabuzima byo mu mazi bicuruzwa mu isoko ryo muri Wuhan mu Bushinwa, hanyuma ikava muri ibyo binyabuzima ijya mu bantu. Abandi bavugaga ko iyo virusi yaba yaravuye mu nyamaswa zo mu gasozi, abantu baziriye bakandura bagatangira kuyihererekanya.

Ibi ariko byakomeje gukemangwa cyane n’ubuyobozi bwa Perezida Trump muri Amerika buvuga ko u Bushinwa budashaka ko hamenyekana inkomoko nyakuri y’iyi virus, kubera ko hari ibihuha byavugaga ko iyi virus yaba yarakorewe muri Laboratwari.

Ibi bihuha bikaba byaratejwe umurindi nuko mu mujyi wa Wuhan aho virusi yahereye hari ikigo gikora ubushakashatsi kuri za virusi cyitwa Wuhan Institute of Virology, icyo kigo kikaba cyegeranye n’aho isoko ry’ibinyabuzima byo mu mazi riherereye. Icyo kigo kandi kijya gikora ubushakashatsi kuri virusi ziba mu ducurama zirimo na coronavirus.

Bikaba byaratumye bamwe bakeka ko virusi yaba yaratorotse muri laboratwari, cyangwa se umwe mu bakozi muri iyo laboratwari akayijyana hanze igatangira gukwirakwira mu bantu.

Abashakashatsi ba OMS bagiye gukora iperereza kuri iyi virus, bo bavuga ko impamvu nyamukuru yo gukora iri perereza atari ukugira ngo bashakishe icyasha k’ u Bushinwa, ahubwo ko bashaka kumenya neza aho iyi virus yakomotse bityo bakamenya uko hakirindwa icyorezo nk’iki mu gihe kizaza.

Umushakashatsi uturuka muri Kaminuza yo mu Budage witwa Fabian Leendertsz, uri mu icumi bazajya muri Wuhan, yabwiye ikinyamakuru Associated Press ko bazakorana n’abashakashatsi bo mu Bushinwa mu gihe cy’ibyumweru bine cyangwa bitanu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .