00:00:00 IGIHE NETWORK KN KINYARWANDA EN ENGLISH FR FRANCAIS

U Bushinwa bwamuritse ubwato bw’intambara buhambaye

Yanditswe na Zigiranyirazo Bajecteur
Kuya 18 June 2022 saa 08:53
Yasuwe :

Leta y’u Bushinwa yamuritse ubwato bw’intambara bufatwa nk’ubukoranye ikoranabuhanga riteye imbere ndetse inzobere mu by’urugamba zavuze ko iki gihugu mu buryo bwihuse gikomeje kurya isyataburenge Leta Zunze Ubumwe za Amerika mu bikorwa nk’ibyo.

Ubu bwato bwamuritswe ku wa Gatanu w’iki cyumweru. Bufite ubushobozi bwo kugwaho indege, gutwara ibikoresho bikomeye bya gisirikare n’ibindi bikenerwa mu rugamba rwo mu mazi.

CNN yavuze ko ubu bwato bwubakiwe ahitwa Jiangnan muri Shangai hagenewe icyo gikorwa, bwahawe izina rya “Fujian”.

Amakuru ava mu Bushinwa avuga ko ari ubwo bwato ari ubwa mbere bwo kuri urwo rwego bwakorewe igishushanyombonera bukanubakirwa imbere mu gihugu hifashishijwe “catapult”, ibikoresho byifashishwa mu kurasa ibisasu bikomeye bigera kure birimo na za misile ndetse n’indege zikaba zibasha kubuhagurukiraho.

Ikigo gishinzwe Ingamba n’Ubushakashatsi Mpuzamahanga (CSIS) gikorera i Washington kivuga ko mu kubaka ubwato bwa Fujian, hifashishijwe ikoranabuhanga rivuguruye hagendewe ku ryakoreshejwe mu kubaka ubundi bwato bubiri bwabanjirije ubu harimo ubwiswe “Liaoning” na “Shandong.”

Igikorwa u Bushinwa bwamuritse, gifatwa nk’intambwe ikomeye kuko ubwato bwabwo bushyirwa ku rwego rumwe n’ubwa Amerika ku buryo bizabufasha kwizera ubushobozi mu bijyanye n’ubwato nyuma y’aho hazaba hamaze gukorwa amagerageza atandukanye kuri Fujian nk’uko Ibiro Ntaramakuru, Xinhua bibitangaza ko ari cyo kigiye gukurikiraho nyuma yo kumurika ubu bwato.

Ubwato bwa Fujian bukoranye ibyuma bikomeye bifatwa nk’ingabo byagenewe kubukingira ndetse bunafite ubushobozi bwo gutwara imizigo ifite uburemere bwa toni 80.

Umuyobozi mu Mushinga w’u Bushinwa mu Kigo cya CSIS, Matthew Funaiole, avuga ko ubu bwato ari bwo bwa mbere iki gihugu kigize buteye imbere mu ishami ry’igisirikare kandi bukomeza gushimangira icyo u Bushinwa bushobora gukora.

Kugeza ubu, u Bushinwa buza ku isonga mu bihugu bifite umubare munini w’abasirikare barwanira mu mazi ku buryo kugira ubwato nk’ubu ari indi ntwaro ihambaye iki gihugu gikomeje kubakiraho ubuhangange bwacyo.

U Bushinwa bugeze kuri iyi ntambwe mu gihe hakomeza gututumba umwuka mubi hagati yabwo na Taiwan ndetse na Leta Zunze Ubumwe za Amerika mu gihe zikomeza kugaragaza gushyigikira no gutera ingabo mu bitugu ibihugu byo muri Aziya bikorana na yo. Abasesenguzi bavuga ko ari umugambi ugamije kunaniza u Bushinwa mu by’ubukungu no mu bya gisirikare.

U Bushinwa bwamuritse ubwato bw’intambara buhambaye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .