U Bushinwa bwageze ku bushobozi bwo gupima COVID-19 abantu hafi miliyoni 5 ku munsi

Yanditswe na Iradukunda Serge
Kuya 6 Kanama 2020 saa 09:24
Yasuwe :
0 0

Mu gihe ibihugu byinshi bikirwana no kuzamura umubare w’abantu bishobora gupima icyorezo cya Covid-19, u Bushinwa bwo busa n’ubwamaze kwesa uyu muhigo, kuko bugeze ku bushobozi bwo gupima abantu barenga miliyoni 4.8 ku munsi.

Kugira ngo humvikane neza ubushobozi iki gihugu gifite mu gupima umubare w’abantu benshi, bivuze ko mu gihe kitarenze iminsi itatu cyaba kimaze gupima abanyarwanda bose kandi buri wese akabona ibisubizo mu gihe cy’iminota 30.

Ubu bushobozi bw’u Bushinwa mu bijyanye n’umubare w’abapimwa Covid-19 ku munsi burenze ubw’ibindi bihugu bikomeye birimo Leta Zunze Ubumwe za Amerika, dore ko imibare ya Hopkins University igararagaza ko mu mezi atatu ashize umubare w’abantu benshi Amerika yaba yarapimye mu munsi umwe ari ibihumbi 920.

Uretse ibijyanye n’umubare w’abapimwa, u Bushinwa buri imbere kandi y’ibihugu bikomeye mu gutanga ibisubizo vuba, dore ko upimwa abasha kubona ibisubizo bye mu minota 30, mu gihe mu Bwongereza bisaba amasaha 72 naho muri Amerika bikaba bishobora no gufata icyumweru ngo umuntu abone ibisubizo bye.

Minisiteri y’Inganda n’ikoranabuhanga ivuga ko ubushobozi u Bushinwa bufite mu gupima covid-19 buhagije “kugira ngo ubyifuza wese apimwe ndetse n’uwo bikenewe ko apimwa na we apimwe.”

Ubu bushobozi buhambaye bw’u Bushinwa mu gupima umubare munini w’abantu mu munsi umwe bwatumye igihugu gishobora gupima abantu miliyoni 10 batuye Wuhan ndetse n’abarenga miliyoni 20 muri Beijing.

Uba u Bushinwa bubasha gupima Covid-19 umubare munini w’abantu kandi mu gihe gito, bubikesha ikoranabuhanga bwavumbuye ryo gupima iki cyorezo mu buryo bwihuse, hakoreshejwe udukoresho tuzwi nka ‘rapid nucleic acid testing kits’, aho gukoresha uburyo bukoreshwa mu bindi bihugu aho ibipimo bibanza kujyanwa muri Laboratwari.

N’ubwo ubu buryo bushya bwo gupima bushobora kumvikana nk’ubutizewe, ubuyobozi mu Bushinwa buvuga ko butanga ibisubizo byizewe ku kigero cya 95%, ibintu byatumye iki gihugu gishyira ubushobozi bwinshi mu gukora umubare munini w’udukoresho nk’utu, dore ko muri Nyakanga ibigo 20 byari byatangiye kwinjira mu bikorwa byo kudukora.

Minisitiri wungirije w’Inganda n’ikoranabuhanga, Wang Jiangping avuga ko utu dukoresho dupima mu buryo bwihuse tumaze kugeza mu bitaro byo hirya no hino muri iki gihugu.

Ati “Udukoresho dupima tugera kuri miliyoni 200 twamaze gukwirakwizwa mu bitaro, ibigo bishinzwe kurwanya iki cyorezo, ku byambu ndetse n’ahandi hose hapimirwa hirya no hino mu gihugu”

Nubwo u Bushinwa bugenda bugera ku ikoranabuhanga ribufasha gupima Covid-19 abantu benshi mu gihe gito, muri iki gihugu haracyagaragara ubwandu bushya dore ko abamaze kwandura bose babarirwa mu bihumbi 88 barimo 37 banduye ku wa 5 Kanama, mu gihe abo iki cyorezo kimaze guhitana muri iki gihugu bo bagera ku 4,677.

Kugeza ubu u Bushinwa bufite ubushobozi bwo gupima Covid-19 abarenga miliyoni enye mu munsi umwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .