Mu iyi mbuga, hari kuba akarasisi karyoheye ijisho kagizwe n’abasirikare, ibifaru na misile. Amabendera ndetse n’amafoto y’abasirikare barwanye uru rugamba muri Gicurasi 1945 bikikije abakora akarasisi.

Minisiteri y’Ingabo y’u Burusiya yasobanuye ko abasirikare barenga 11.500 barimo abasanzwe mu ngabo z’igihugu, abo mu rwego rw’ubutasi, abashinzwe ibikorwa by’ubutabazi ndetse n’abo mu mutwe urinda abayobozi bukuru ari bo bitabiriye aka karasisi.

Zimwe mu ntwaro zifashishijwe mu karasisi zirimo izo mu gihe cy’Abasoviyete zirimo ibifaru bya T-34 n’izigezweho nka BMP-1AM, indege z’intambara za Sukhoi 25.

Perezida Vladimir Putin w’u Burusiya ni we watangije ibi birori ku mugaragaro. Iruhande rwe, hari abandi bakuru b’ibihugu bifitanye umubano mwiza n’igihugu cye barenga 20.

Xi Jinping w’u Bushinwa, Alexander Lukashenko wa Belarus, Denis Sassou Nguesso wa Repubulika ya Congo, Capt. Ibrahim Traore wa Burkina Faso, Kim Jong-un wa Koreya ya Ruguru na Robert Fico wa Slovakia bari i Moscow.

Perezida Putin yatangaje uyu ari umunsi w’ibyishimo bivanze n’agahinda ndetse n’ishema Abarusiya batewe n’abasirikare batsinze abari bafite amatwara y’Abanazi, bagasubiza ikiremwamuntu ubwisanzure.

Ati “Tubungabunga mu kwizera urwibutso rw’ibi bikorwa by’ubutsinzi kandi nk’abakurambere bacu, twizihiza umunsi mukuru nk’uwacu, uw’ingenzi ku gihugu cyacu.”

Uyu Mukuru w’Igihugu yatangaje ko u Burusiya buzakomeza kuba urukuta abafite amatwara y’Abanazi badashobora kumeneramo, burwanye ababufitiye urwango. Ati “Tuzakomeza kurwanya ubugizi bwa nabi bukorwa n’abashaka gushyira imbere ibitekerezo bisenya. Ukuri n’ubutabera biri ku ruhande rwacu.”

Mu Ntambara ya Kabiri y’Isi, ingabo z’Abasoviyete zifatanyaga n’iz’ibihugu byo mu Burengerazuba bw’Isi birimo Leta Zunze Ubumwe za Amerika n’u Bwongereza. Igitutu zashyize ku Banazi cyatumye Adolf Hilter wayoboraga u Budage yiyahura.

Mbere y'uko akarasisi gatangira, abaturage n'abasirikare bafashe amafoto

Perezida Vladimir Putin hamwe n'abasirikare bakuru, mbere yo gutangiza akarasisi

Abasirikare baserukanye impuzankamo y'ibirori

Abasirikare b'abakobwa ni uku baserutse mu karasisi

Abasirikare barwanye uru rugamba bitaweho by'umwihariko

Abasirikare bitabiriye aka karasisi bagaragaje imbaraga zidasanzwe

Ibifaru na byo byifashishijwe muri aka karasisi

Iyi modoka ihetse misile yambukiranya imigabane

Indege za Sukhoi-25 ni zo zifashishijwe mu karasisi ko mu kirere

Perezida Putin yatangaje ko u Burusiya buzakomeza kwitambika abafite amatwara y'Abanazi

Aka karasisi kari kubera mu mbuga nini ya Moscow izwi nka Red Square

Putin n'abandi banyacyubahiro

Capt Ibrahim Traoré wa Burkina Faso ni umwe mu bakuru b'ibihugu bitabiriye ibi birori

Umunyamabanga w'Akanama k'Umutekano k'u Burusiya, Sergei Shoigu, agenzura ingabo mbere y'akarasisi