00:00:00 IGIHE NETWORK KN KINYARWANDA EN ENGLISH FR FRANCAIS

U Burusiya bwigaruriye umujyi wa Soledar muri Ukraine

Yanditswe na IGIHE
Kuya 11 Mutarama 2023 saa 10:37
Yasuwe :

Umutwe wigenga witwara gisirikare wo mu Burusiya, Wagner, watangaje ko wafashe umujyi wa Soledar wo muri Ukraine, umaze iminsi uberamo imirwano ikomeye.

Uyu mujyi wo mu burasirazuba bw’igihugu uzwiho kugira ibirombe byinshi by’umunyu.

Umuyobozi mukuru wa Wagner, Yevgeny Prigozhin, yagize ati "Abasirikare b’umutwe wigenga wa Wagner ubu baragenzura agace kose ka Soledar. Mu mujyi rwagati hazengurutswe, intambara mu mujyi irakomeje. Umubare w’abafashwe uzatangazwa ejo."

Umuyobozi w’agateganyo wa Leta yigenga ya Donetsk (DPR), Denis Pushilin, yavuze ko imijyi ya Soledar na Artemovsk yombi yenda kubohorwa.

Soledar iri muri bilometero 15 uvuye mu mujyi wa Bakhmut, ku buryo kuwufata bivuze byishi muri uru rugamba rwenda kumara umwaka.

Icyakora, Ikigo cyo muri Amerika gishinzwe iby’intambara, Institute for the Study of War, cyatangaje ko ibyo u Burusiya buvuga bikwiye kwitonderwa, kuko "butarafata umujyi wose wa Soledar."

Kiti "Umujyi wa Soledar ntabwo urafatwa wose n’ubwo u Burusiya buvuga ko wamaze gufatwa, ndetse ko Bakhmut ishobora kuzengurukwa mu gihe gito."

Minisitiri w’Ingabo wa Ukraine we yaje kwandika kuri Twitter ko "nyuma yo guhura n’ibihombo bikomeye, u Burusiya bukigerageza gufata Soledar – iwabo w’ibirombe binini by’umunyu mu Burayi."

Gufata Soledar byaba ari intambwe ikomeye y’u Burusiya, nyuma y’uko mu gice cya kabiri cy’umwaka ushize bwavanye ingabo mu mijyi myinshi.

Icyakora, gufata umujyi wa Bakhmut byo bishobora kugerwaho haguye abasirikare benshi.

Ni ibintu u Burusiya buvuga ko byaba ari intambwe ikomeye mu rugendo rwo kwigarurira agace kose ka Donetsk.

Iyi ntambara yatangiye muri Gashyantare 2022, igiye kumara umwaka ihanganishije ibi bihugu bibiri binini cyane mu Burayi.

Ukraine yakomeje guhabwa intwaro nyinshi n’ibihugu birimo u Burayi na Leta zunze ubumwe za Amerika, aho ubu bibarwa ko igera muri miliyari $48.5.

Ni inkunga yenda kungana n’ingengo y’imari u Burusiya bwakoresheje mu gisirikare cyabwo mu 2022, igera kuri miliyari $51.1, nk’uko igenekerezamibare ry’ibiro ntaramakuru by’u Burusiya, TASS, ribivuga.

Nibura ngo inkunga yose Ukraine imaze guhabwa kuva intambara yatangira isaga miliyari $150.8. Ni inkunga iruta ingego y’imari ya Ukraine ku mwaka, isaga miliyari $55.5.

Mu gihe intambara ikomeje, u Burusiya bwatangaje ko kuri uyu wa Kabiri ingabo zabwo zasenye ibirindiro by’Ingabo za Ukraine mu bice bya Kherson na Zaporozhye, harimo n’ububiko bw’ibikoresho bya gisirikare.

Intambara y'u Burusiya na Ukraine ikomeje gufata indi ntera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .