00:00:00 IGIHE NETWORK KN KINYARWANDA EN ENGLISH FR FRANCAIS

U Burusiya bwemeje ko abasirikare 63 bishwe na misile za Ukraine

Yanditswe na IGIHE
Kuya 2 Mutarama 2023 saa 07:47
Yasuwe :

Minisiteri y’Ingabo y’u Burusiya yemeje ko abasirikare nibura 63 bayo bishwe na misile za Ukraine, mu gihe icyo gihugu cyo cyavugaga ko cyishe abagera muri 400.

Ni igitero cyabaye mu gihe u Burusiya nabwo bwateye misile nyinshi kuri Ukraine, by’umwihariko no ku murwa mukuru Kyiv.

Misile zahitanye abasirikare b’u Burusiya zatewe ku nyubako iri mu mujyi wa Makiivka, aho bikekwa ko ingabo z’u Burusiya zari zikambitse.

Miisiteri y’Ingabo y’u Burusiya yatangaje ko barashweho misile esheshatu zoherejwe na MLRS Himars y’Abanyamerika, ku birindiro byakoreshwaga by’agateganyo.

Yakomeje iti "Intwaro z’u Burusiya zikumira ibitero byo mu kirere zahanuye misile ebyiri zarashwe na HIMARS. Ibindi bisasu bine byagize ingaruka zirimo urupfu rw’abasirikare 63 b’u Burusiya."

Iyi minisiteri yavuze ko imiryango n‘inshuti b’aba basirikare bazafashwa kandi bagahabwa inkunga.

Amashusho menshi yakwirakwijwe na Ukraine agaragaza inyubako ndende y’igorofa yarashwe ikangirika bikomeye.

Bamwe mu basesenguzi bavuga ko ari uburangare bukomeye ku Burusiya, kuba bwaremeye ko abo basirikare bajya mu nyubako imwe kandi nta bwirizi buhambaye buhari.

Ku rundi ruhande, u Burusiya bwavuze ko bwagabye ibitero byinshi muri Donetsk na Kharkhiv, byishe abacanshuro 70 b’abanyamahanga, abasaga 100 bagakomereka.

Ni mu gihe muri Kupyansk, u Burusiya buvuga ko bwishe abasirikare 30 ndetse busenya imodoka ebyiri z’intambara n’imodoka eshatu za gisirikare. Naho muri Krasniy Liman bwishe abasirikare 40, bwica 110 ahantu hatandukanye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .