00:00:00 IGIHE NETWORK KN KINYARWANDA EN ENGLISH FR FRANCAIS

U Burusiya bwajyanye mu nkiko abasirikare 92 ba Ukraine

Yanditswe na IGIHE
Kuya 25 July 2022 saa 09:51
Yasuwe :

Komisiyo Ishinzwe Ubugenzacyaha mu Burusiya, yatangaje ko abantu 220 barimo abayobozi bakuru mu ngabo za Ukraine bakekwaho uruhare mu byaha byibasiye ikiremwamuntu, ndetse ibirego 92 byamaze gutangwa.

Umuyobozi w’iyi komisiyo, Alexander Bastrykin, yabwiye ikinyamakuru Rossiiskaya Gazeta ko mu iperereza ry’ibanze, bimaze kugaragara ko abantu 220 bashobora kuba baragize uruhare mu byaha bibangamiye amahoro n’umutekano by’ikiremwamuntu.

Yavuze ko abo bantu barimo abo mu buyobozi bukuru bw’Ingabo za Ukraine n’abayobozi b’imitwe itandukanye mu ngabo z’icyo gihugu, "bateye ibisasu ku basivili".

Yavuze ko muri abo, hamaze gutangwa ibirego ku bayobozi 92 b’ingabo n’ababungirije.

Yakomeje ati "Abantu 96 bashyizwe ku rutonde rw’abashakishwa, barimo abayobozi 51 bo mu ngabo za Ukraine."

Yavuze ko muri rusange hamaze gufungurwa ibirego 1.300 bireba abantu 400.

Baregwa kugaba ibitero ku basivili muri Donbass - igice kigize uburasirazuba bwa Ukraine - guhera ku wa 17 Gashyantare 2022. Ni igice kigizwe n’intara ebyiri nini za Donetsk na Lugansk.

Ku wa 21 Gashyatare, Perezida Putin yasinye iteka ryemeza turiya duce nka repubulika ebyiri za rubanda, zigenga, ndetse u Burusiya businyana n’abayobozi bazo amasezerano y’ubucutu no gufatanya.

Utwo duce twateweho ibisasu byinshi n’Ingabo za Ukraine zishaka kongera kuhagenzura, ariko u Burusiya buvuga ko ibyo bisasu byishe abasivili benshi ndetse bisenya n’ibikorwa remezo.

U Burusiya bwohereje ingabo muri Ukraine ku wa 24 Gashyantare, mu cyo bwise ubusabe bw’abayobozi ba ziriya repubulika zo muri Donbass.

Umuyobozi wa Komisiyo y'Ubugenzacyaha mu Burusiya, Alexander Bastrykin, yavuze ko abasirikare ba Ukraine bakoze ibyaha byibasiye inyokomuntu

Minisitiri Lavrov yageze muri Congo

Minisitiri w’Ububanyi n’Amahanga w’u Burusiya, Sergey Lavrov, yageze muri Repubulika ya Congo mu ruzinduko arimo kugirira muri Afurika.

Lavrov yageze i Brazaville aturutse mu Misiri, aho yatangiriye uruzinduko. Biteganyijwe ko kuri uyu wa Mbere agirana ibiganiro n’ubuyobozi bwa Congo.

Ni urugendo rugamije kubaka ubufatanye na Afurika, mu gihe u Burusiya bukomeje kutoroherwa n’ibihano bwafatiwe n’u Burayi na Leta Zunze Ubumwe za Amerika.

Afurika n’u Burusiya kandi birimo gutegura inama izahuza izi mpande zombi mu 2023. Lavrov azakomereza uru ruzinduko muri Uganda na Ethiopia.

Ibinyampeke bigiye gutangira gusohorwa muri Ukraine

Minisiteri y’Ingabo ya Turikiya yemeje ko mu minsi mike umusaruro w’ibinyampeke waheze muri Ukraine ushobora koherezwa mu mahanga, ibintu byatanga agahenge mu bijyanye n’ibura ry’ingano ku isi.

Nyuma y’amasezerano yasinywe ku wa Gatanu hagati y’u Burusiya na Ukraine, muri Turikiya aho byabereye hahise hashyirwa ibiro bihurizwamo ibikorwa byo kugenzura ikoreshwa ry’ibyambu byo mu Nyanja y’Umukara.

Minisiteri y’Ingabo ya Turikiya yatangaje kuri iki Cyumweru ko gutangira kohereza mu mahanga uyu musaruro ari mu gihe cya vuba bishoboka.

Ibiro bihurizwamo ibikorwa ngo birimo gukora ibishoboka byose, kugira ngo ibinyampeke bya mbere byoherezwe ku isoko mpuzamahanga kandi mu buryo butekanye.

Amakuru avuga ko muri ibyo biro, Turikiya, u Burusiya na Ukraine bihagarariwe n’abasirikare ku rwego rwa colonel cyangwa jenerali. Umuryango w’Abibumbye na wo ufite abawuhagarariye.

Bagenzura ikoreshwa ry’ibyambu bitatu bikomeye bya Ukraine, birimo Odessa, Yuzhny na Chernomorsk.

Ibi byose byubakiye ku masezerano yasinywe ku wa 22 Nyakanga i Istanbul, hagamijwe gukemura ikibazo cyugarije isi cy’ubuke bw’ibiribwa n’inyongeramusaruro biva muri Ukraine n’u Burusiya.

Hanateganywamo uburyo bwo gusaka amakontineri atwaye ibinyampeke, hirindwa ko hari abakwihisha mu bihe by’intambara bagashyiramo intwaro cyangwa hakaba ubundi bushotoranyi.

Lavrov yageze muri Congo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .