U Burusiya bwagerageje igisasu gishya gihanura indege

Yanditswe na Dufitumukiza Salathiel
Kuya 26 Ukuboza 2020 saa 08:31
Yasuwe :
0 0

Mu ijoro ryo kuwa 23 rishyira uwa 24 Ukuboza 2020, u Burusiya bwagerageje igisasu gishya cyo kwifashisha mu guhanura indege (anti-aircraft missile).

Iyo misile nshya yiswe Strela-10M yakozwe n’ikigo cya Kalashnikov, cyanakoze imbunda yacyitiriwe ndetse ikamenyekana cyane ya AK-47.

Amashusho n’amajwi y’iryo gerageza yafashwe, agaragaza iyo misile isuzumirwa mu gace kitwa Dunguz kari hafi y’umupaka w’u Burusiya na Kazakhstan, aho yarashwe mu kirere kirimo umwijima, ikakizengurukamo ishaka igipimo (target).

Hagaragajwe ko kandi uburyo bukoreshwa iyo misile iraswa bishoboka ko hakohererezwa misile nyinshi mu kirere icya rimwe ku bipimo bitandukanye.

Kalashnikov yasobanuye ko Strela-10M ifite ubushobozi bwo guturitsa indege nini zizwi nka low-flying planes mu Cyongereza, helicopter, drone, ndetse n’ibisasu binini by’intambara bizwi nka “cruise missiles.”

Hasobanuwe ko kandi iyo misile ishobora koherezwa mu kirere mu bihe ibyo ari byo byose by’umwaka nta kibazo, ndetse ko ifite ubushobozi bwo guhangana n’ubwirinzi ubwo ari bwo bwose indege yaba ifite.

Strela-10M itandukanira n’izindi misile zihanura indege ku kuba yihinduranya ikakira ikirere cyose isanze, cyaba kirimo urumuri, cyangwa kirimo izindi nzitizi bigaragara ko zatuma mu kirere hatagaragara neza.

U Burusiya ni kimwe mu bihugu by’ibihangange mu Isi bikunze kugaragaza ubukaka n’igitinyiro mu bya gisirikare, mu kwereka amahanga ko urwego rw’umutekano rwabwo ruhagaze neza kandi buhora buryamiye amajanja.

Iki gisasu gishya cyageragejwe n'u Burusiya kiri mu bishya icyo gihugu giherutse gukora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .