00:00:00 IGIHE NETWORK KN KINYARWANDA EN ENGLISH FR FRANCAIS

U Burusiya burimo gutegura ibitero bishya kuri Kharkiv: Amakuru agezweho mu ntambara na Ukraine

Yanditswe na IGIHE
Kuya 21 June 2022 saa 04:02
Yasuwe :

Perezida wa Ukraine Volodymyr Zelenskyy yatangaje ko u Burusiya burimo kwisuganya ngo bugabe ibitero bishya ku gace ka Kharkiv, mu ntambara ibihugu byombi birimo kurwana kuva muri Gashyantare.

Zelensky yabwiye inama ya Global Policy Forum irimo kubera mu Butaliyani ati "Ubu ingabo z’u Burusiya zirimo kwegeranya imbaraga ngo zongere gutera Kharkiv. Twaje kwisubiza kano gace. None barashaka kongera kukisubiza, kandi tuba tubibona."

Yavuze ko nibura abaturage miliyoni 12 bamaze kuvanwa mu byabo n’iyi ntambara, barimo miliyoni eshanu bahungiye hanze y’igihugu.

U Burusiya bugiye gutangira gukoresha missile nshya

Perezida w’u Burusiya Vladimir Putin yatangaje ko iki gihugu kigiye kurushaho kongerera imbaraga igisirikare no kukivugurura, kikazatangira no gukoresha missiles zishobora kwambukiraya imigabane zizwi nka Sarmat, mbere y’uko uyu mwaka wa 2022 urangira.

Ni ijambo yavuze kuri uyu wa Kabiri, ubwo yaganirizaga abanyeshuri barangije amasomo abinjiza mu gisirikare.

Muri iryo jambo ryanyuze kuri televiziyo, Putin yavuze ko u Burusiya buzakomeza kongera imbaraga mu gisirikare, bijyanye n’ibibazo by’umutekano igihugu gifite.

Yongeyeho ko izi Sarmat intercontinental ballistic missiles (ICBM) ziheruka kugeragezwa, zigiye kongerwa mu ntwaro iki gihugu gifite.

Ati "Birateganyijwe ko kugeza mu mpera z’uyu mwaka, icyiciro cya mbere cy’izi ntwaro kizaba cyifashishwa ku rugamba rwacu."

Ni ibisasu bifite ubushobozi bwo gutwara ibiturika bisaga 10 bifite imbaraga za kirimbuzi.

U Burusiya bwasuzumye icyo gisasu muri Mata, mu gihe byari bikomeje kunugwanugwa ko bushobora kujya mu ntambara yeruye n’Uburengerazuba bw’Isi kubera urugamba burimo kurwana muri Ukraine.

Putin yanavuze ko ingabo z’igihugu zanatangiye guhabwa intwaro zirinda ibitero byo mu kirere n’ibya za missiles za S-500, "zidafite izindi wazigereranya ku Isi."

Yavuze ko Sarmat ari intwaro zihariye, zizafasha igihugu kwirinda ibibazo by’umutekano bishobora guturuka hanze.

Abanyamerika bafatiwe muri Ukraine bashobora kwicwa

Umuvugizi w’ibiro bya Perezida w’u Burusiya (Kremlin), Dmitry Peskov, yatangaje ko u Burusiya butakwizeza ko Abanyamerika bafatiwe ku rugamba muri Ukraine badashobora gukatirwa urwo gupfa.

Peskov yabigarutseho mu kiganiro na televiziyo NBC, kuri uyu wa Mbere.

Yagize ati "Nta kintu nakwizeza. Bizaterwa n’ibizava mu iperereza."

Mu cyumweru gishize nibwo byatangajwe ko Abanyamerika babiri bahoze no mu ngabo z’icyo gihugu, Alexander Drueke na Andy Huynh, bafatiwe mu mirwano mu gace ka Kharkiv.

Abongereza Aiden Aslin, Shaun Pinner n’umunya-Maroc Brahim Saadoun na bo bafatiwe muri Ukraine, baheruka gukatirwa urwo gupfa mu rukiko rwo mu gace ka Dpnetsk, katangaje ko ari repubulika yigenga.

Leta Zunze Ubumwe za Amerika iheruka gutangaza ko ishaka kujya mu mishyikirano n’u Burusiya, hakarebwa uburyo abo baturage bayo barekurwa.

Abanya-Ukraine barenga 1500 bafungiwe mu Burusiya

Minisitiri w’Intebe wungirije wa Ukraine, Iryna Vereshchuk, yatangaje ko leta ya Moscow ifunze abasivili bagera mu 1,500 b’Abanya-Ukraine, muri gereza zitandukanye.

Yagize ati "Ubu bari muri Rostov, Kursk, bari muri gereza, bameze nk’infungwa z’intambara nyamara badakwiye kuba ari zo."

Umunyamerika yiciwe muri Ukraine

Minisiteri y’Ububanyi n’Amahanga wa Leta Zunze Ubumwe za Amerika, yemeje ko umuturage umwe yiciwe mu ntambara muri Ukraine mu kwezi gushize.

Ni Umunyamerika wari winjiye mu ntambara, arwana ku ruhande rwa Ukraine mu ntambara ihanganyemo n’u Burusiya.

Stephen Zabielski w’imyaka 52 yiciwe mu mirwano ku wa 15 Gicurasi.

Umuvugizi wa Minisiteri y’Ububanyi n’Amahanga ya Amerika yaburiye abaturage b’iki gihugu kwirinda kujya muri Ukraine, kubera ko ingabo z’u Burusiya zishobora kubibasira mu buryo bw’umwihariko.

Agace ka Kherson kagiye gukoresha kamarampaka

Ubuyobozi bw’agace ka Kherson bugiye gukoresha kamarampaka, igomba kwemeza niba bakomeza kuba agace ka Ukraine cyangwa niba biyomeka ku Burusiya.

Ibiro ntaramakuru by’u Burusiya, RIA Novosti, byemeje ko iyi kamarampaka izaba mbere y’uko uyu mwaka urangira.

Umuyobozi wungirije w’aka gace, Kirill Stremousov, yagize ati "Turimo kwitegura kamarampaka, nyuma yayo tuzaba tugengwa n’u Burusiya mu buryo bwuzuye."

Ntabwo yatangaje igihe izabera mu buryo ntakuka, ariko yaciye amarenga ko bizaba ari hagati y’amezi ya Nzeri na Ugushyingo.

Ingabo z’u Burusiya zikomeje kwinjira mu mujyi wa Severodonetsk

Ingabo z’u Burusiya zinjiye mu gice cy’inganda zyo mu mujyi wa Severodonetsk, ukomeje kugabwaho ibitero bikomeye.

Guverineri w’agace ka Luhansk, Serhiy Haidai, yabwiye abanyamakuru ati "Ibintu hano ni nko mu kuzimu. Ibintu byose biri mu muriro, ibisasu ntabwo bihagarara n’isaha imwe."

Haidai yavuze ko uruganda rwa Azot rutanga ingufu zishingiye ku binyabutabire, ari rwo rwonyine rutarafatwa.

Bibarwa ko nibura abantu bagera muri 300 bihishe muri uru ruganda.

Ibice byinshi bya Ukraine bimaze gusenywa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .