00:00:00 IGIHE NETWORK KN KINYARWANDA EN ENGLISH FR FRANCAIS

U Burusiya bukomeje kwigarurira imijyi myinshi: Ibigezweho mu ntambara na Ukraine

Yanditswe na IGIHE
Kuya 15 July 2022 saa 12:16
Yasuwe :

Inzego z’ubutasi z’u Bwongereza zemeje ko Ingabo z’u Burusiya zikomeje kwigarurira imijyi myinshi mu burasirazuba bwa Ukraine, ndetse nyuma yo gufata umujyi wa Lysychansk mu gace ka Luhansk, zirimo kwerekeza mu mujyi wa Siversk muri Donetsk.

Minisiteri y’Ingabo y’icyo gihugu yemeje ko u Burusiya burimo gutera ibisasu byinshi, ari nako zigira imbere, zifungura amayira agana mu mijyi ya Sloviansk na Kramatorsk.

Izi ngabo ngo zamaze gusatira umujyi wa Siversk, ndetse ngo nyuma yo kuwigarura byuzuye, hazakurikiraho uwa Bakhmut.

U Burusiya bukomeje kugaba ibitero ku mijyi yo mu burasirazuba buzwi nka Donbas

U Burusiya bwarashe howitzers za Ukraine

U Burusiya bwarashe imbunda nini zo mu bwoko bwa M777 howitzers mu gace ka Kharkiv, mu rugamba ibi bihugu birimo kurwana nk’uko byemejwe n’umuvugizi w’Ingabo z’u Burusiya, Lieutenant-General Igor Konashenkov.

Yatangaje ati "Ibi bikurikira byangijwe ku rugamba: imbunda nini irasa za missile nyinshi hafi ya Sloviansk, imbunda nyinshi zirasa za rokete (Rockettes) muri Nikolayevka muri repubulika ya rubanda ya Donetsk, n’imbunda zakorewe muri Leta zunze ubumwe za Amerika za M777 howitzers, ahantu hatandukanye muri Pervomaisky mu gace ka Kharkov."

Yanatangaje ko indege z’u Burusiya zarashe ikigo cyinjirizwagamo abarwanyi b’abanyamahanga bashaka gufasha Ukraine mu ntambara, hicwamo 43, abandi 170 barakomereka.

Lt Gen Konashenkov yavuze ko muri rusange, kuva iyi ntambara yatangira muri Gashyantare 2022, indege z’intambara 249, kajugujugu 137, drones 1,534, missile zo mu kirere 354, ibifaru n’izindi modoka z’intambara 4,050, imbunda nini 744 zirasa za rokete, imbunda nini 3,145 n’imodoka 4,292 za gisirikare, byarashwe.

Izi mbunda za M777 zishobora kurasa mu ntera iri hagati ya kilometero 25 - 40. Zifite ubushobozi bwo kurasa mu buryo bugambiriye ntizipfe guhusha, kuko zikoresha GPS n’amashusho ya drones mu guhamya neza intego igambiriwe.

U Burusiya bwakoresheje intwaro zabwo mu kurasa imbunda nini za Ukraine

Korea ya Ruguru yikomye Ukraine

Minisiteri y’Ububanyi n’amahanga ya Korea ya Ruguru yavuze ko Ukraine idafite ishingiro ryo kwamagana kuba iki gihugu cyemeye ubwigenge bwa repubulika za rubanda za Donetsk na Lugansk.

Yavuze ko icyo gihugu kidafite uburenganzira bwo kwibaza ku cyemezo cya leta ya Pyongyang cyitwaje ubusugire, kuko na yo yafashe icyemezo kitaboneye cyo kwiyunga na Amerika muri politiki y’ubushotoranyi.

Yakomeje iti "Tuzakomeza gushimangira no kongerera imbaraga ubucuti n’ubutwererane n’ibihugu byose byubaha ubusugire bwacu, kandi bikadufata mu buryo bukwiye hashingiwe ku mahame y’uburinganire, kutivanga mu miyoborere y’abandi no kubahana."

Pyongyang yashinje Washington gushyira imbere ubushotoranyi, mu bihano yafatiye icyo gihugu kubera gusuzuma ibisasu bya missiles biraswa mu ntera ndende.

Ku wa Gatatu, Minisitiri w’Ububanyi n’amahanga wa Korea ya Ruguru, Choe Son-hui, yoherereje amabaruwa bagenzi be muri repubulika zo muri Donbas, abagaragariza ko abashyigikiye.

Perezida wa Ukraine, Volodymyr Zelensky, yavuze ko igihugu cye kuzagira icyo gikora kuri icyo cyemezo.

Perezida wa Brésil yemeje ko azi umuti w’intambara

Perezida wa Brésil, Jair Bolsonaro, yavuze ko azi uburyo intambara y’u Burusiya na Ukraine "yahoshwamo", ndetse ko azageza igitekerezo cye kuri Perezida Volodymyr Zelenskyy, mu kiganiro bateganya kuri telefoni ku wa 18 Nyakanga.

Yabwiye abanyamakuru ati "Nzamubwira igitekerezo cyanjye, icyo ntekereza.Nzi uburyo bishobora gukemurwamo. Ariko ntabwo nabibwira undi muntu uwo ari we wese."

Icyakora, Bolsonaro yavuze ko iyi ntambara ishobora kurangira kimwe n’iyarose hagati ya Argentine n’u Bwongereza mu 1982, nubwo nta byinshi yavuze.

Iyo ntambara yatangiye bapfa ubusugire bwa Falkland Islands muri Atlantique. Ingabo za Argentine zagiye kuri ibyo birwa byagenzurwaga n’u Bwongereza, buhita bwoherezayo ingabo zo kubarwanya ndetse mu gihe gito bamanika amaboko.

Agace ka Zaporizhzhia kagiye kwiyomeka ku Burusiya

Ubuyobozi bw’agace ka Zaporizhzhia buteganya gukoresha kamarampaka yo kwemeza niba abaturage bakeneye kwiyomeka ku Burusiya, ndetse ngo ishobora kuba mu gihe cya vuba.

Umukuru w’ubuyobozi bwa gisirikare muri ako gace, Yevgeny Balitsky, yabwiye abanyamakuru ko aya matora ateganywa mu mezi ya nyuma y’uyu mwaka.

Yakomeje ati "Maze kwakira ubusabe bwinshi bw’amasendika y’abakozi, n’impirimbanyi z’abasivili, basaba ko twagena imitegekere y’agace kacu mu gihe cya vuba gishoboka."

"Mu kuganira nabo, twabonye ko bakeneye kuba kamwe mu duce tw’u Burusiya, ikaba Intara ya Zaporizhzhia."

Yavuze ko mu bubasha bwe nk’umuyobozi wa gisirikare w’ako gace, yafashe icyemezo cyo gutegura amatora.

Ni mu gihe 70% bya Zaporizhzhia byamaze kwamburwa ingabo za Ukraine, ariko umurwa mukuru waho, umujyi wa Zaporizhzhia, uracyagenzurwa n’ubutegetsi bwa Kyiv.

Ku wa Mbere, Perezida Vladimir Putin yasinye iteka ryoroshya kubona ubwenegihugu ku baturage bose ba Ukraine.

Mbere hateganywagamo abaturage bo muri Repubulika ya Rubanda ya Luhansk n’iya Donetsk, n’Intara za Kherson na Zaporizhzhia.

Ubusanzwe, kugira ngo umuturage wa Ukraine yoroherezwe kubona ubwenegihugu bw’u Burusiya ntabwo yasabwaga kuba amaze imyaka itanu atuye mu Burusiya, kuba afite uburyo bumwinjiriza amafaranga ndetse akaba azi Ikirusiya, nk’uko bisabwa ku bandi.

Bibarwa ko hejuru ya kimwe cya kabiri cy’abaturage ba Zaporizhzhia bari hanze y’agace kagenzurwa na Leta ya Kyiv, bashyigikiye kwihuza n’u Burusiya.

Perezida Putin yorohereje abaturage ba Ukraine guhabwa ubwenegihugu bw'u Burusiya
Intambara y'u Burusiya na Ukraine imaze iminsi 143
Ibice byinshi bya Ukraine bimaze gusenywa n'intambara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .