U Buhinde: Minisitiri w’Intebe yasabye imbabazi kubera ingamba yashyizeho zo gukumira Coronavirus

Yanditswe na Habimana James
Kuya 30 Werurwe 2020 saa 08:57
Yasuwe :
0 0

Minisitiri w’Intebe w’u Buhinde, Narendra Modi, yasabye imbabazi igihugu cye nyuma yo gufata ingamba zihagarika ibikorwa mu gihugu hirindwa ikwirakwira rya Coronavirus, ariko zikaza kunengwa ko byakozwe mu buryo butanoze.

Ku wa Kabiri nibwo Minisitiri w’Intebe muri iki gihugu, yafashe ingamba zikomeye zirimo guhagarika ibikorwa byinshi mu gihugu no guhagarika ingendo z’imodoka, hirindwa ko Coronavirus yakomeza gukwirakwira.

Kugeza ubu abantu barenga 1000 bamaze kwandura iki cyorezo mu Buhinde, mu gihe abandi 25 bamaze gupfa muri iki gihugu gituwe n’abarenga miliyari 1.3.

BBC ivuga ko nyuma y’aho Modi afashe iki cyemezo, mu masaha make inzego z’umutekano zatangiye kuyashyira mu bikorwa, bituma mu gihugu havuka akavuyo, abaturage bamwe bategekwa gusubira aho bakomoka ku birenge mu gihe hari kure.

Nyuma yo kubona akababaro kari mu gihugu, Modi yahisemo gusaba imbabazi ku ngaruka zatewe n’icyemezo yafashe, gusa avuga ko nta yandi mahitamo yari ahari mu guharika ko gikomeza gukwira.

Yagize ati “Kugeza ubu ndimo kubona abavandimwe banjye nkabona uburyo barimo gutekereza, baravuga bati uyu ni Minisitiri w’Intebe ki wadushyize muri ibi bihe bikomeye? Ndasaba ko bambabarira, ndabizi neza ko abenshi barandakariye kubera ko nabafungiye mu mazu yabo.”

“Ndimo kumva akababaro kanyu ariko nta yandi mahitamo yari ahari mu gutsinda uru rugamba rwa COVID-19, ni urugamba rw’ubuzima kandi tugomba kurutsinda.”

Ibiro ntaramakuru by’Abongereza Reuters, byavuze ko ku wa Gatandatu umuntu umwe yaguye mu nzira ubwo yagendaga ibilometero 270 n’amaguru, asubira aho akomoka.

Leta y’u Buhinde yahise itangaza ko igihe gukoresha miliyari 22 z’amadorali ya Amerika mu gufasha abakene, harimo kubaha ibiribwa n’amafaranga.

Gusa hari impungenge ko bitazagera kuri buri wese ubikeneye.

Abantu batandukanye baravuga ko abanduye iki cyorezo mu Buhinde bashobora kwiyongera, kubera ingamba zashyizweho ariko bikagaragara ko zitanoze.

Bagaragaza ko kubera uburyo abantu benshi bavuye mu mijyi ikomeye basubira aho bakomoka n’amaguru, bashobora kuzakwirakwiza iki cyorezo kigahitana abatari bake.

Kugeza ubu abantu barenga ibihumbi 700 bamaze kwandura Coronavirus ku Isi, mu gihe abandi ibihumbi 33 bamaze gupfa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .