U Buhinde: Minisitiri w’Intebe yakingiwe Coronavirus

Yanditswe na Dufitumukiza Salathiel
Kuya 1 Werurwe 2021 saa 01:58
Yasuwe :
0 0

Minisitiri w’Intebe w’u Buhinde, Narendra Modi, yahawe urukingo rwa COVID-19 kuri uyu wa Mbere tariki 1 Werurwe 2021, ubwo hatangizwaga ikingira rusange nyuma y’uko abakozi bo mu nzego z’ubuzima barangije kugerwaho n’iyo gahunda.

BBC yatangaje ko Modi yahawe urukingo rwa Covaxin, rwakozwe na sosiyete ya Bharat Biontech yo muri icyo gihugu.

Uyu mugabo w’imyaka 71 y’amavuko, yamaze guhabwa urukingo ajya ku rukuta rwe rwa Twitter ahamagarira n’abandi bagerwaho kwemera bakaruhabwa batazuyaje.

Yanditse ati “Ubu maze guhabwa dose ya mbere y’urukingo rwa COVID-19. Nashimishijwe n’uko abaganga bacu bari gukorana umurava mu gushyigikira Isi mu rugamba rwo guhashya COVID-19. Ndashishikariza buri wese uri bugerweho kwemera guhabwa urukingo. Reka dushyire hamwe tube mu Buhinde buzira Coronavirus.”

U Buhinde bwatangiye ibikorwa byo gukingira ku wa 16 Mutarama uyu mwaka bufite intego yo kuzaba bwakingiye nibura miliyoni 300 muri Nyakanga, ariko kugeza ubu hamaze gukingirwa miliyoni 14 gusa ku buryo bisa n’ibitazagerwaho.

Abakora mu nzego z’ubuzima ni bo bahereweho, hakurikizwaho abarengeje imyaka 60 n’abafite hejuru ya 45 bafite ubundi burwayi.

Inkingo za AstraZeneca na Covaxin zikorerwa muri icyo gihugu ni zo bakoresha bakingira zonyine kugeza ubu.

Abarwayi ba COVID-19 bamaze kuboneka mu Buhinde ubu bararenga miliyoni 11, aho muri bo miliyoni 10,7 bakiyikize naho abasaga ibihumbi 157 yarabahitanye.

Minisitiri w'Intebe w'u Buhinde, Narendra Modi, yahawe dose ya mbere y'urukingo rwa Coronavirus/ Ifoto: BBC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .