U Buhinde bwohereje icyogajuru cyabwo Chandrayaan-2 ku kwezi

Yanditswe na Sekamana Mathias
Kuya 22 Nyakanga 2019 saa 06:50
Yasuwe :
0 0

U Buhinde bwohereje icyogajuru cyabwo cya kabiri nyuma y’aho iki gikorwa cyari cyasubitswe mu cyumweru gishize kubera ibibazo bise ibya tekiniki.

Iki cyogajuru cyiswe Chandrayaan-2 cyoherejwe mu isanzure kuri uyu wa mbere saa 9:13 ku isaha ngengamasaha ya GMT, kuri sitasiyo ya Sriharikota

U Buhinde bwizeye ko uyu mushinga watwaye akayabo ka miliyoni 150 z’amadolari ya Amerika uzaba uwa mbere ushoboye kugera mu ruhembe rw’amajyepfo y’ukwezi.

Iki cyogajuru kizamara iminsi 23 mu kirere mbere y’uko hatangira akazi ko kukigeza ku kwezi kazakorerwa kuri mudasobwa.

Umuhango wo kohereza iki cyogajuru werekenywe kuri televiziyo y’u Buhinde no ku mbuga nkoranyambaga z’ikigo gishinzwe iby’ikirere muri iki gihugu.

Abantu bishimye cyane ubwo kohereza iki cyogajuru byari birangiye, benshi bishimira ko ari umushinga wayobowe n’abagore babiri kuva mu itangira ryawo.

Muthaya Vanitha ni umuyobozi w’uyu mushinga naho Ritu Karidhal niwe uyoboye ubwo butumwa bwo ku kwezi. Ubu nibwo butumwa bukomeye ikigo gishinzwe iby’isanzure mu Buhinde gikoze mu mateka yacyo.

Umuyobozi w’iki kigo cyitwa Isro, K Sivan yagize ati "Iri ni itangiriro ry’urugendo rw’amateka u Buhinde bukoze rugana ku kwezi.”

Yashimiye abashakashatsi, abubatse icyo cyogajuru n’abandi bakozi bose hamwe bagera ku 1000 bakoze kuri uyu mushinga.

Minisitiri w’intebe Narendra Modi yavuze imyato uyu mushinga avuga ko ari umwihariko, nta wundi urabaho bisa.

BBC yanditse ko iri yoherezwa mu kirere ry’iki cyogajuru ryari ryahagaritswe kuwa 15 Nyakanga mbere y’iminota 56 yonyine ngo cyoherezwe kubera ikibazo bise icya tekiniki.

Itangazamakuru ryo mu Buhinde ryavuze ko inzira inyuramo umwuka wa helium muri moteri y’icyo cyogajuru itari yizewe.

Ubutumwa bwa mbere bwu Buhinde ku kwezi bwari ubw’icyogajuru Chandrayaan-1 mu 2008.

Ntabwo iki cyogajuru cyageze ku kwezi, ariko cyifashishije indebakure (Radars) nicyo cyatanze amakuru afatika ku mazi yaho kurusha ibindi byose byoherejweyo.

Biteganyijwe ko Chandrayaan-2 izagerageza kugera mu majyepfo y’ukwezi kuko ari ko gace kadafitweho amakuru ahagije kurusha utundi.

Ubu butumwa ngo buzibanda ku kugaragaza byinshi k’ubutaka bwo ku kwezi, gushakisha niba haba amazi n’imyungu ngugu, gupima imitingito yaho n’ibindi.

Iki cyogajuru cyohereje gipima toni 640, kikaba gifite umurambararo wa metero 44.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza