00:00:00 IGIHE NETWORK KN KINYARWANDA EN ENGLISH FR FRANCAIS

U Buhinde bwijeje kongera ingano y’inkingo mu gihe impfu z’abahitanwa na COVID-19 zikomeje gutumbagira

Yanditswe na IGIHE
Kuya 16 Gicurasi 2021 saa 07:01
Yasuwe :
0 0

U Buhinde bwatanze icyizere cyo kongera ingano y’inkingo zitangwa muri iki gihugu mu gihe Leta zitandukanye zatangaje ko zigiye kongera igihe cya Guma mu Rugo mu rwego rwo kugenzura ikwirakwira ry’icyorezo cya COVID-19 kimaze guhitana abantu 270.000 muri icyo gihugu.

Reuters yanditse ko mu masaha 24 yashize, umubare w’abahitanwa na COVID-19 mu Buhinde wongeye kurenga 4.000 ku nshuro ya kane muri iki cyumweru.

Ubwandu bushya bwabonetse mu Buhinde kuri iki Cyumweru bungana na 311.170 ndetse buri hasi cyane ugereranyije n’ubwabonekaga mu byumweru birenga bitatu bishize.

Abayobozi mu nzego z’ubuzima mu Buhinde basabye leta zitandukanye kongera ibyumba byo kwita ku ndembe no kuzamua ubushobozi bw’abakozi bo kwa muganga.

Leta za Delhi na Haryana zongereye Guma mu Rugo yagombaga kurangira ku wa Mbere.

Umuyobozi wa Leta ya Delhi, Arvind Kejriwal, yavuze ko ubwiyongere bw’abandura ugereranyije n’ibipimo byafashwe byageze kuri 10% bivuye kuri 30% mu ntangiriro z’ukwezi.

Ati “Inyungu twabonye mu cyumweru gishize, ntidushaka kuyitakaza. Tugiye kongera igihe cya Guma mu rugo ho icyumweru.’’

Leta ya Kerala na yo yaherukaga gutangaza ko Guma mu rugo yongerewe, yashyizeho ingamba zikakaye mu turere dutandukanye kuva ku wa Gatandatu.

Yatangiye gukoresha drones mu guta muri yombi abaturage batambara udupfukamunwa n’abangiza amabwiriza yo gushyirwa mu kato.

Guverinoma y’u Buhinde yatangaje ko igihe kohereza dose miliyoni 5.1 z’inkingo za COVID-19 mu gihe cy’iminsi itatu.

Nubwo u Buhinde ari cyo gihugu kiri ku isonga mu gukora inkingo nyinshi ku Isi, abaturage miliyoni 141.6 gusa ni bo bahawe urukingo rwa mbere, bangana na 10% ya miliyari 1.35 y’abatuye iki gihugu.

U Buhinde bumaze gukingira abaturage miliyoni 40.4, bangana na 2.9% by’abaturage batuye igihugu.

Kuva iki cyorezo cya Coronavirus cyagaragara mu Buhinde, abaturage basaga miliyoni 24,7 baracyanduye, abagikize barenga miliyoni 20,8 mu gihe abo cyahitanye bangana n’ibihumbi 270.

U Buhinde bwijeje kongera ingano y’inkingo mu gihe impfu z’abahitanwa na COVID-19 zikomeje gutumbagira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .