00:00:00 IGIHE NETWORK KN KINYARWANDA EN ENGLISH FR FRANCAIS

U Bufaransa: Umukandida ku mwanya wa Perezida yahaniwe gukwirakwiza amagambo abiba urwango

Yanditswe na IGIHE
Kuya 17 January 2022 saa 05:07
Yasuwe :

Umwe mu bakandida ku mwanya wa Perezida mu matora ateganyijwe mu Bufaransa muri Mata uyu mwaka, Eric Zemmour, yaciwe ihazabu y’ibihumbi 10 by’ama-euro kubera amagambo ye abiba urwango rushingiye ku ibara ry’uruhu.

Muri Nzeri 2020, Zemmour yari aherutse kuvuga mu itangazamakuru ko abana bato b’abimukira baburanye n’ababyeyi babo ari ‘abajura’, ‘abicanyi’ ‘n’abafata ku ngufu’.

Icyo gihe yari mu kiganiro mpaka kuri CNews, nyuma y’igitero hafi y’inyubako zahoze zikorerwamo n’ikinyamakuru Charlie Hebdo.

Yagize ati “Nta kindi bafite cyo gukora hano, ni abajura, ni abicanyi, ni abafata ku ngufu, ni uko bameze, igikwiye ni ukubirukana, ntibikwiye ko baza ino.”

Urukiko mpanabyaha rw’i Paris, ni rwo rwaciye ihazabu Eric Zemmour kuri uyu wa Mbere.

Ubushinjacyaha bwari bwamusabiye gucubwa ibihumbi 10 by’amayero agafungwa mu gihe yaba atayishyuye.

Umuyobozi ushinzwe ibiganiro kuri CNews na we yaciwe 5000 by’amayero, kubera ubufatanyacyaha na Eric Zemmour, utari mu rukiko ubwo ihazabu yaciwe yatangazwaga kuri uyu wa 17 Mutarama 2022.

Zemmour uri mu nahatanira umwanya w’umukuru w’igihugu ku ruhande rw’aba-Extreme Droite, yagaragajwe nk’uwarengereye uburenganzira bwo kuvuga ibyo atekereza akoresheje amagambo yuje agasuzuguro, ateye isoni kandi yuzuye urugomo ku bimukira.

Umwunganizi we Me Olivier Pardo, yavuze ko ibyo yavuze ari ukuri nubwo yakoresheje imvugo ihutaza kandi ko nta kubiba urwango rushingiye ku ibara ry’uruhu kurimo kuko abo bana batagize ibara ry’uruhu, igihugu cyangwa ubwoko.

Si ubwa mbere Zemmour akurikiranwaho ibyaha byo kubiba urwango kuko byamubayeho inshuro ebyiri ariko akagenda abikurirwaho.

Biteganyijwe ko azaburana mu bujurire ku wa Kane ku byaha byibasiye inyokomuntu aho yavuze mu 2019 ko Maréchal Philippe Pétain, yatabaye Abayahudi bo mu Bufaransa.

Yakuriweho ibihano muri Gashyantare 2021, urukiko ruvuga ko amagambo ye yayavuganye uguhubuka ubwo yari mu kiganirompaka cyagarukaga ku ntambara yo muri Syrie.

Umwunganizi we yabwiye AFP ko azasaba ko iburanisha ryimurirwa mu gihe kitarenze amezi atatu mbere y’icyiciro cya mbere cy’amatora ya Perezida.

Ku wa Gatanu, ubutabera bwemeje ko bitarenze Gicurasi 2023 Eric Zemmour azaburanishwa ku byaha byo gusebanya bishingiye ku mvugo ye mu 2019 ku ba ‘feministe’ no ku bagize umuryango wa ‘LGBTQ’.

Eric Zemmour ni umwe mu bakandida bahatanira umwanya w'Umukuru w'Igihugu mu Bufaransa mu matora azaba muri Mata 2022

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .