00:00:00 IGIHE NETWORK KN KINYARWANDA EN ENGLISH FR FRANCAIS

U Bufaransa: Ukekwaho kwica Khashoggi yatawe muri yombi, Arabie Saoudite isaba ko arekurwa

Yanditswe na IGIHE
Kuya 8 Ukuboza 2021 saa 11:28
Yasuwe :

Polisi yo mu Bufaransa yataye muri yombi Khalid Alotaibi w’imyaka 33, akekwaho kuba mu itsinda ry’abishe umunyamakuru Jamal Khashoggi mu 2018.

Ambasade ya Arabie Saoudite iri i Paris mu Bufaransa yahise itangaza ko habayeho kwibeshya ku myirondoro yemeza ko uwatawe muri yombi ntaho ahuriye n’ikirego cy’abishe Khashoggi.

Khalid yafunzwe na polisi yo ku mupaka hagendewe ku mpapuro zo kumuta muri yombi zakozwe n’igihugu cya Turikiya mbere yo gufata indege ijya i Riyadh ku Kibuga cy’Indege cya Gaulle.

France24 dukesha iyi nkuru yatangaje ko izina rya Khalid ryagaragaye mu iperereza ryakozwe na Washington Post.

Kuri uyu wa Kabiri Ambasade ya Arabie Saoudite yatangaje ko umuturage wa Arabie Saoudite wafatiwe i Paris, adafite aho ahuriye n’abishe Khashoggi ndetse agomba guhita arekurwa igitaraganya.

Iri tangazo rivuga ko ubutabera bwa Arabie Saoudite bwari bwaramaze gukurikirana iki kibazo cy’abishe umunyamakuru ndetse abahamijwe ibyaha ubu barimo gukora ibihano bakatiwe n’inkiko.

Khashoggi yaburiwe irengero tariki ya 2 Ukwakira 2018, nyuma yo kwinjira mu nyubako ikoreramo uhagarariye Arabie Saoudite muri Turikiya agiye gusaba ibyangombwa bimwemerera gushyingiranwa n’umunya-Turikiya, Hatice Cengiz, ariko agenda ubutagaruka.

Umukunzi we yatangiye gutabaza ariko ngo abakozi b’aho bamubwira ko yasohokeye mu rugi rw’inyuma. Mu gukomeza gushakisha nibwo hatangiye kuboneka amakuru ko yishwe.

Jamal Khashoggi wari ufite imyaka 59, yigeze kuba umujyanama wa leta ya Arabie Saoudite ndetse yigeze no kuba hafi y’umuryango w’I Bwami bwa Arabie Saoudite, ariko baza gushwana ahungira muri Amerika mu 2017.

Umunyamakuru Jamal Khashoggi yiciwe muri Turikiya mu 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .