00:00:00 IGIHE NETWORK KN KINYARWANDA EN ENGLISH FR FRANCAIS

U Bufaransa: Marine Le Pen yamaganye abamushinja kunyereza umutungo

Yanditswe na IGIHE
Kuya 18 April 2022 saa 06:17
Yasuwe :

Marine Le Pen, uhanganiye na Perezida Emmanuel Macron kuyobora u Bufaransa, yamaganye abamushinja gukoresha nabi umutungo w’Umuryango w’Ubumwe bw’u Burayi (EU), avuga ko ari uburyo bwo kumwangisha rubanda mu gihe habura iminsi itandatu ngo habe icyiciro cya kabiri cy’amatora.

Le Pen hashize iminsi ashinjwa gukoresha nabi amafaranga ya EU ubwo yari umudepite mu Nteko Ishinga Amategeko y’uwo muryango.

Ubushinjacyaha bw’u Bufaransa bwatangaje ko bwatangiye kugenzura ibishinjwa Le Pen.

Kuri uyu wa Gatandatu nibwo ikinyamakuru cyo mu Bufaransa gikora inkuru zicukumbura, Mediapart cyatangaje ko Le Pen ashinjwa gukoresha nabi amayero 137,000.

Le Pen kuri uyu wa Mbere yabwiye abanyamakuru ko nta bwoba atewe n’ibyamutangajweho kuko abimenyereye.

Ati “Aya mayeri ashaje y’Umuryango w’Ubumwe bw’u Burayi ndayamenyereye akenshi iyo habura iminsi mike ngo habe icyiciro cya kabiri cy’amatora. Sintekereza ko biriya bizarangaza Abafaransa.”

Le Pen yavuze ko ibyo bamushinja nta shingiro na mba bifite.

Si ubwa mbere Le Pen avugwaho gukoresha nabi amafaranga ya EU kuko no mu 2018 yakozweho iperereza n’inzego z’ubugenzacyaha mu Bufaransa ashinjwa gusesagura amafaranga ku bakozi bari bamukoreraga ubwo yari umudepite wa EU.

Le Pen na bamwe mu bagize ishyaka rye Rassemblement National bashinjwa gukoresha amafaranga ya EU mu bibazo by’ishyaka aho kuba mu nyungu z’umuryango.

Marine Le Pen yavuze ko ibyo ashinjwa bigamije kumubuza amahirwe mu cyiciro cya kabiri cy'amatora kizaba muri iki cyumweru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .