U Bufaransa bwahagaritse ikoreshwa rya hydroxychloroquine mu kuvura Coronavirus

Yanditswe na Bukuru JC
Kuya 27 Gicurasi 2020 saa 02:38
Yasuwe :
0 0

Abaganga bo mu Bufaransa ntibemerewe kongera gukoresha umuti wa hydroxychloroquine, mu kuvura abarwayi ba Coronavirus, ni nyuma y’uko kuri uyu wa Gatatu inzego ngishwanama ebyiri zitangaje ko ushobora kugira ingaruka zikomeye ku buzima.

Uyu muti uhagaritswe nyuma y’uko hashize iminsi hari uguhangana ku ngingo y’uko waba uvura Coronavirus, ndetse bimwe mu bihugu bigatangiza igeragezwa ryawo. Perezida Trump ni umwe mu bemeza ko hydroxychloroquine, ivura Coronavirus.

U Bufaransa bufashe iki cyemezo nyuma y’uko kuri uyu wa Kabiri Ishami ry’Umuryango w’Abibumbye ryita ku Buzima (OMS) ryahagaritse igeragezwa ry’umuti wa hydroxychloroquine, uvura Malaria.

OMS igaragaza ko abantu bafata umuti wa hydroxychloroquine, baba bafite ibyago byo gupfa cyangwa kugira ibibazo by’umutima kurenza abatawufashe.

Ku rundi ruhande ariko abayobozi ba Algeria batangaje ko badateze guhagarika gukoresha hydroxychloroquine mu kuvura Coronavirus.

Ubushakashatsi bushya bwari buherutse kugaragaza ko nubwo hakomeje kuvugwa ibyo kuvura Coronavirus hakoreshejwe imiti ya hydroxychloroquine uvura Malaria cyangwa Chloroquine, nta nyigo iragaragaza ko ikora neza, ahubwo ubushakashatsi bwerekanye ko biteza ibyago birimo urupfu.

Abashakashatsi bagaragaje ko abantu barembye cyane kubera COVID-19 bavuwe hakoreshejwe hydroxychloroquine na chloroquine, ibyago byo gupfa byiyongereye kimwe n’ihinduka ry’imiterere y’umutima, ibizwi nka ‘arrhythmia’.

Umuti wa hydroxychloroquine ntuzongera gukoreshwa mu kuvura Coronavirus mu Bufaransa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .