00:00:00 IGIHE NETWORK KN KINYARWANDA EN ENGLISH FR FRANCAIS

Twitter yagejeje mu nkiko umuherwe Elon Musk

Yanditswe na IGIHE
Kuya 13 July 2022 saa 11:58
Yasuwe :

Twitter yareze umuherwe Elon Musk mu rukiko, irusaba kumuhatira kugura uru rubuga nkoranyambaga rukoreshwa na benshi ku isi nk’uko babyemeranyije, none akaba ashaka kwisubiraho.

Ni ikirego cyatanzwe mu rukiko rwo muri Leta ya Delaware kuri uyu wa Kabiri, nyuma y’uko Musk yandikiye Twitter ayimenyesha ko ashaka gusesa amasezerano y’ibanze yemeranyijweho, yo kugura Twitter kuri miliyari $44.

Muri iyo baruwa yo ku wa Gatanu, umunyamategeko wa Musk yavuze ko Twitter “yarenze ku ngingo z’amasezerano”, yanga gutanga amakuru Musk yasabaga ngo amenye umubare nyakuri wa konti za baringa (bots) ziba kuri Twitter.

Iki kigo kigenekereza ko zitarenga 5% bya konti zose, ndetse giheruka kuvuga ko buri munsi gisiba konti zisaga 500,000 za baringa.

Abanyamategeko ba Twitter ku wa Mbere basubije Musk ko kwivana muri iri hererekanya “bidakurikije ishingiro ndetse ari amakosa”, bamushinja ko ubwe yarenze ku masezerano, asabwa kuyakurikiza nta kabuza.

Bavuga ko badashaka kubuza Musk kongera kurenga ku byemeranyijweho, ahubwo ingingo nke zisigaye zikanozwa vuba, ihererekanya rikaragira.

Mu gihe Musk avuga ko ashaka kuva mu masezerano yo kugura Twitter, yo ivuga ko akwiye guhatirwa kubahiriza ibyo yemeye mbere.

Icyo kirego kigira kiti "Muri Mata 2022, Elon Musk yinjiye mu masezerano yo kugura Twitter ateganya ibyo buri ruhande rusabwa ngo igura rirangire, yiyemeza gukora ibishoboka byose ngo aya masezerano ashyirwe mu bikorwa.”

"Ubu, nyuma y’amezi atagera kuri atatu, Musk yanze kubahiriza ibyo yemeranyije na Twitter n’abafatanyabikorwa bayo, kubera ko amasezerano yasinye atari mu nyungu ze bwite.”

Urukiko ubu nirwo rugomba kwemeza niba Twitter ihatira Musk kubahiriza aya masezerano akayegukana, cyangwa niba agomba kwishyura miliyari $1 nk’igihano cyateganyijwe ku muntu wakwivana mu masezerano binyuranyije n’amategeko.

Nyuma yo gutangaza ko ashaka kugura Twitter kugira ngo ayiceho konti za baringa (bots), mu minsi ishize Musk yagaragaje ko izo konti zishobora kuba ari nyinshi kurusha uko iki kigo ubwacyo cyabitangaje.

Ibyo birushaho gutera inkeke ku mubare nyakuri w’abantu bakoresha Twitter mu buryo buhoraho.

Hari ababihuza ariko no kuba Musk arimo gushaka urwitwazo ngo asese amasezerano bitewe n’uko azishyura Twitter amafaranga ari hejuru, urebye igihe imigabane yabariwe n’aho igeze uyu munsi, kuko yaguye cyane.

Byongeye, imigabane w’uruganda Tesla rukora imodoka yari yizeye ko azakuramo amafaranga menshi ngo agure Twitter, na yo yaramanutse cyane kuva ariya masezerano yemeranywaho.

Twitter yashinje Musk ko yibwira ko ashobora gukoresha iki kigo akemera kukigura, yarangiza akisubiraho, akagiharabika, agahungabanya ibikorwa byacyo, akangiza n’agaciro k’abafatanyabikorwa bacyo, maze bigacira aho.

Kwivana mu masezerano na Twitter ngo “byatuma igirwaho ingaruka ku bikorwa byayo by’ubucuruzi, abakozi no ku isoko ry’imari n’imigabane.”

Nubwo kuri uyu wa Kabiri umugabane wa Twitter wazamutseho 4%, urimo kugurishwa 34% munsi y’agaciro wari ufite ku munsi Twitter na Musk bemeranyijeho aya masezerano, na 37% munsi y’igiciro Musk yemeye gutanga.

Icyo gihe bemeranyije ko Musk agomba kwishyura $54.20 ku mugabane umwe.

Ibyo byose bishyira ihurizo ku iri hererekaya ry’ubucuruzi, niba koko Musk w’imyaka 50, ari na we muherwe wa mbere ku isi na miliyari $219 azemera iki gihombo akagura Twitter, cyangwa niba azemera guhanwa, ikigo akakirekera bene cyo.

Elon Musk agiye gutangira kuburana na Twitter

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .