Trump yijujutiye General Motors ku kutihutisha gukora imashini zifasha abanduye COVID-19 guhumeka

Yanditswe na Habimana James
Kuya 28 Werurwe 2020 saa 12:26
Yasuwe :
0 0

Perezida Donald Trump, yavuze ko uruganda rw’imodoka ruri mu zikomeye muri Amerika rwa General Motors (GM), rwakora ibikoresho byinshi bifasha abanduye Coronavirus guhumeka, nyuma yo kurushinja kugenda biguru ntege.

Trump yavuze ko GM itakaza igihe, kandi hakenewe kugira igikorwa ngo ubuzima bw’Abanyamerika burengerwe.

Bimwe mu bimenyetso biranga uwanduye Coronavirus, hari aho agera bigasaba ko afashwa n’imashini guhumeka.

Kugeza ubu Leta Zunze Ubumwe za Amerika zugarijwe mu buryo bukomeye na Covid-19 kurenza ahandi ku Isi.

Imibare igaragaza ko Abanyamerika ibihumbi birenga 100 bamaze kwandura mu gihe abandi barenga 1.700 bamaze gupfa.

Perezida Trump aherutse kuvuga ko ibikorwa bya gisirikare bidakenewe, ko izi nganda zigomba guhindura icyerekezo mu kurwanya ikwirakwira cya Covid-19.

Trump yagize ati “Iki cyorezo kirimo kwihuta cyane ku buryo bisaba ko habaho uburyo bwo gusubiza ibintu ku murongo.”

Gusa yongeye kujya kuri twitter avuga ko “GM bigaragara ko irimo kugabanya umubare w’izi mashini yari yarijeje gukora, kuko zagombaga kugera ku bihumbi 40, nyamara ubu zikaba ari ibihumbi bitandatu gusa.”

Trump ashinja umuyobozi mukuru wa GM, Mary Barra, kubigiramo uruhare.

BBC ivuga ko uru ruganda ruvuga ko rushobora gukora izi mashini zigera ku bihumbi 10 buri kwezi, ariko ibi rukazabikora guhera muri Mata uyu mwaka.

Muri iki gihe ibihugu hirya no hino ku isi bikeneye izi mashini kuko abantu benshi bazikeneye.

Hari amakuru avuga ko imashini zigera ku bihumbi 900 zikenewe mu gufasha abarwayi muri iki gihugu.

Mu Mujyi wa New York honyine ngo hakenewe izi mashini zifasha abantu guhumeka zigera ku bihumbi 30, gusa Trump we yavuze ko izi ari nyinshi cyane, ariko umuyobozi w’Umujyi, Andrew Cuomo, yateye utwatsi Trump, avuga ko imashini bakeneye zigendanye n’imibare y’abarwayi bafite.

Umujyi wa New York urugarijwe kuko imibare igaragaza ko kuri uyu wa Gatanu gusa, abantu ibihumbi birindwi banduye iki cyorezo.

Muri uyu mujyi kandi hari abarwayi barenga ibihumbi 44, abamze gupfa bararenga 500.

Trump yavuze ko hagomba gukorwa imashini nyinshi zifasha abantu banduye Coronavirus guhumeka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .