Trump yashyigikiye abasaba ko ushinzwe ibyo kurwanya COVID-19 muri USA yirukanwa

Yanditswe na IGIHE
Kuya 13 Mata 2020 saa 05:39
Yasuwe :
0 0

Perezida wa Leta Zunze Ubumwe za Amerika, Donald Trump yashyigikiye abasaba ko , Dr Anthony Fauci uyobora ikigo cy’indwara zandura yirukanwa kubera kunanirwa inshingano.

Dr Anthony Fauci niwe ushinzwe guhuza ibikorwa byo guhashya icyorezo cya coronavirus gikomeje guhitana ubuzima bw’abanyamerika.

Uku kwibasira Dr Anthony Fauci kuje nyuma y’ikiganiro yatanze kuri CNN, avuga ko iyo amabwiriza yo kuguma mu rugo no gusaba abaturage kwirinda kwegerana bitangwa kare, coronavirus itari guhitana abantu bangana n’abo imaze guhitana.

Leta Zunze Ubumwe za Amerika zimaze kugira abantu basaga ibihumbi 550 banduye coronavirus, mu gihe abantu ibihumbi 22 yabahitanye. Nicyo gihugu gifite benshi banduye na benshi bapfuye.

DeAnne Lorraine , umwe mu bahoze mu Nteko Ishinga Amategeko akaba aturuka mu ishyaka rimwe na Trump, yanditse kuri Twitter anenga Fauci asubiramo amagambo y’ibinyamakuru ati “Iyo Trump aza kumva kare inzobere mu buvuzi, yakabaye yaratabaye ubuzima bwa benshi. Igihe kirageze ngo Fauci yirukanwe.”

Perezida Trump na we yahise akwirakwiza ubwo butumwa (retweet) yongeraho ati “Ibihuha gusa, ukuri kurazwi. Nakomanyirije u Bushinwa mbere cyane y’uko abantu babivuga. Murakoze.”

Trump ashinjwa gusuzugura coronavirus ubwo yabwirwaga ko ari icyorezo gikomeye, we akavuga ko ari ibicurane bisanzwe bidakwiriye gutera ubwoba. Yanagiye avuga ko ari iturufu ya politiki iri gukoreshwa n’aba-democrates batavuga rumwe.

Na nyuma yo gufata ingamba, ubutegetsi bwa Trump bushinjwa kutitegura bihagije no kugira ibikoresho bike.

Gushwana kwa Trump na Fauci kandi kwarushijeho gukara nyuma y’aho kuri iki cyumweru Fauci avuze ko ingamba zafashwe zo guhangana na coronavirus, niziramuka zorohejwe bizaba bibi, mu gihe Trump we ashaka ko byoroshywa ubucuruzi bugakomeza.

Fauci kandi yavuze ko igihe ibintu bizasubirira mu buryo atakimenya , ndetse ko n’amatora ya Perezida mu Ugushyingo atakwizeza ko bazatora uko bisanzwe.

Perezida Trump (iburyo) yashyigikiye abasaba ko Dr Fauci (ibumoso) yirukanwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .