Trump yandikiye Perezida Erdoğan ibaruwa ‘imukanga’ kubera intambara yatangije muri Syria

Yanditswe na Rabbi Malo Umucunguzi
Kuya 17 Ukwakira 2019 saa 02:14
Yasuwe :
0 0

Perezida Donald Trump yandikiye mugenzi we wa Turikiya, Recep Tayyip Erdoğan, ibaruwa imusaba guhagarika ibitero yatangije ku ba-Kourdes muri Syria, anamumenyesha ko nibidakorwa, amateka ashobora kuzahora amwibuka nk’ikibi.

Ni ibaruwa yamwoherereje nyuma y’uko mu cyumweru gishize Turikiya yatangije ibitero ku barwanyi b’aba-Kourdes mu majyaruguru ya Syria, igikorwa cyatangiye Perezida Trump amaze gutangaza ko Amerika igiye gukura ingabo zayo muri ako gace.

Turikiya ivuga ko igamije kwirukana abo barwanyi ku mupaka, ngo ishyireho "akarere gatekanye" katuma impunzi zisaga miliyoni ebyiri z’Abanya-Syria zayihungiyeho, zisubira iwabo.

Kuri uyu wa Gatatu Inteko ishingamategeko ya Amerika- umutwe w’abadepite, yatoye ku bwiganze yamagana icyemezo cya Perezida Trump cyo gukura ingabo za Amerika muri Syria, bavuga ko ari byo byahaye uruhushya Turikiya rwo kugaba ibitero ku barwanyi b’aba-Kurdes bakoranaga na Amerika muri Syria mu kurwanya Islamic State.

Iyi baruwa ya Trump yagiye ahabona, bigaragara ko yanditswe ku wa 9 Ukwakira ariko habanje gushidikanywa ku mwimerere wayo kubera imvugo zuje gukanga zirimo, ariko White House iza gushimangira ko ari Perezida Trump wayanditse.

Iterura iti “Bwana Perezida, reka dukore ikintu kizima! Ntabwo ukwiye kubazwa amaraso y’ibihumbi by’abaturage, kandi nanjye sinshaka kuzabazwa kwangiza ubukungu bwa Turikiya - kandi nzabikora. Nakweretse urugero ruto rw’ibyo nakora mpereye kuri Pasiteri Brunson.”

Aha yashakaga kumwibutsa ubwo Pasiteri Andrew Brunson yafatirwaga muri Turikiya ashinjwa ibyaha by’iterabwoba no gukorana n’abagerageje guhirika ubutegetsi bwa Erdoğan mu 2016, ibyaha we ahakana, akaza kurekurwa mu mwaka ushize Trump yari amaze gukuba kabiri imisoro y’ibyuma, agafatira n’ibihano abantu bagize uruhare mu ifatwa rye.

Trump yakomeje ati “Nakoze uko nshoboye ngo nkemure bimwe mu bibazo byawe. Witenguha Isi. Ushobora gukora ikintu gikomeye. General Mazloum aremera kugirana ibiganiro nawe, kandi aremera guhara ibice bimwe kurusha uko yigeze kubikora mu gihe cyashize. Mfite ibaruwa ye, nayakiriye.”

General Mazloum Abdi ni umunya-Syria uyobora Syrian Democratic Forces (SDF) ziganjemo aba-kourdes. Ayo ni amazina y’intambara, ubusanzwe yitwa Ferhat Abdi Şahin. Yakunze guhangana na Turikiya ari mu mutwe wa Kurdistan Workers’ Party cyangwa se PKK (Partiya Karkerên Kurdistanê), ndetse ubwe ashinjwa kwica abaturage 41 ba Turikiya, agakomeretsa abarenga 400. Uwo Mutwe Turikiya ivuga ko ari uw’iterabwoba.

Trump yakomeje ati “Amateka azahora akwibuka nubikora kandi mu buryo bwa kimuntu. Azanakureba kandi nk’ikibi, nihatagira ikintu cyiza gikorwa. Wiba umuntu wikanyiza. Wiba umunyabushishozi buke.”

Amerika ivuga ko abarwanyi b’aba-Kurdes bagize uruhare rukomeye mu kuyifasha kurwanya umutwe wiyita leta ya kisilamu (Islamic State) muri Syria, ku buryo ubu hari ubwoba ko umutekano muke muri aka karere ushobora gutuma umutwe wa IS wongera kwisuganya.

Abanyamerika banafite ubwoba ko icyo cyuho gishobora gutuma u Burusiya bubona urwaho cyane ko bushyigikiye Perezida Bashar Assad, ku buryo buzagira ijambo rinini mu bibazo bya Syria, kandi ari igihugu gihanganye na Amerika.

Perezida Trump akomeje guhagarara ku cyemezo cye cyo kuvana ingabo za Amerika muri Syria, avuga ko muri Syria "atari umupaka wacu [wo kurwanaho]", ndetse ko abarwanyi b’aba-Kurdes bahoze ari inshuti za Amerika "atari abamalayika". Yongeyeho ko Amerika "atari umupolisi" w’isi.

Perezida Trump na Erdogan bararebana nabi muri iyi minsi
Ingabo z'u Burusiya zikomeje kwigarurira ibice byari ibya Amerika muri Syria

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza