Trump na Obama bateranye amagambo mu butumwa batangiye mu bikorwa byo kwiyamamaza

Yanditswe na Uwimana Abraham
Kuya 22 Ukwakira 2020 saa 07:29
Yasuwe :
0 0

Perezida wa Leta Zunze Ubumwe za Amerika, Donald Trump n’uwo yasimbuye Barack Obama bateranye amagambo ubwo bari mu bikorwa byo kwiyamamaza kw’abakandida bahatanira kuyobora Amerika mu matora yo ku wa 3 Ugushyingo 2020.

Barack Obama yari yagiye gushyikira umukandida w’Aba-Démocrates, Joe Biden, mu bikorwa byo kwiyamamaza byaberaga muri Leta ya Pennsylvania, naho umukandida w’Aba-Républicains Donald Trump yari ari kwiyamamariza muri North Carolina.

Barack Obama mu ijambo rye, yibasiye cyane Donald Trump amwita “marume w’umusazi” ndetse anamushinja ko yasabitswe n’irondaruhu.

Ku rundi ruhande, Trump na we aho yari ari yajoye Obama ku kuba yaribeshye ku bizava mu matora ya 2016.

Mu gihe habura iminsi 13 ngo amatora abe, biragaragara ko Biden ari we usa n’uyoboye, gusa haracyari Leta nyinshi umuntu atamenya ikizavamo bizasaba gutegereza ku munsi nyirizina w’amatora.

Muri uyu mwaka Abanyamerika bari kwitabira gutora hakiri, kuri ubu abagera kuri miliyoni 42 bamaze gutora binyuze ku iposita cyangwa bigiriye ku biro by’itora.

Trump yatangije umuriro ubwo yiyamamarizaga muri Gastonia ku wa Gatatu, ubwo yavugaga ko no mu matora ya 2016 Obama yayatayemo ubwo yashyigikiraga Hillary Clinton.

Yagize ati “Nta muntu warushije Obama gushyigikira Hillary Clinton wayatayemo, mu bikorwa byo kwiyamamaza, yari ari ahantu hose. Ntekereza ko muri rya joro (ry’amatora) undi muntu utariwishimye uretse Hillary, yari Barack Hussein Obama.”

Trump kandi yongeye gusebya Obama kuba yaraburiye icyizere uwari visi-perezida we kuva mu 2009-2017, Joe Biden, ahubwo akamusaba guharira Hillary Clinton yizera ko ari we ushobora kuzatsinda Trump.

Umwaka utaha Obama yabigarutseho avuga ko hari hakenewe amaraso mashya, ibintu byafashwe nk’igitutsi kuri Biden.

Ku rundi ruhande Obama wiyamamarizaga muri Philadelphia na we yibasiye cyane Trump, agaruka ku buryo yananiwe guhangana na Coronavirus ndetse avuga ko Biden natsinda bazaba bakize umuperezida w’umusazi.

Yagize ati “Ntabwo tuzagira umuperezida uta umurongo akibasira abatamushyigikiye cyangwa akabatera ubwoba ko yabafunga. Iyo myitwarire ntisanzwe ku muperezida, uretse wenda marume w’umusazi uri hariya.”

Obama yakomeje avuga ko abatora batagomba kuzihanganira iyo myitwarire avuga ati “imyitwarire ni ingenzi, uko umuntu ameze bifite agaciro.”

Yagarutse kandi n’uburyo Trump yananiwe guhangana na Coronavirus agira ati “Trump ntabwo azaturinda na gato, nta n’ubwo yatera intambwe yoroshye yo kwirinda we ubwe.”

Imodoka zirenga 280 nizo zari zuzuye aho ziparikwa zivuza amahoni mu kwishimira amagambo ya Obama kuri Trump.

Obama azakomereza ibi bikorwa byo kwamamaza Biden, mu mijyi y’ingenzi mu matora, harimo nka Florida, Miami na Orlando mu cyumweru gitaha.

Biden amaze icyumweru cyose atagaragara mu bikorwa byo kwiyamamaza, yitegura ikiganiro mpaka cya nyuma kiri mu ijoro ryo kuri uyu wa Kane, muri Tennessee.

Perezida Trump na Obama bateranye amagambo mu butumwa batangiye mu bikorwa byo kwiyamamaza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .