Trump akomeje kwijundika u Bushinwa abwishyuza ibyangijwe na Coronavirus

Yanditswe na Nkurunziza Ferdinand
Kuya 28 Mata 2020 saa 10:16
Yasuwe :
0 0

Perezida wa Leta Zunze Ubumwe za Amerika, Donald Trump, yongeye gushimangira ko igihugu cye gishobora kwishyuza u Bushinwa miliyari nyinshi z’amadorali yo gusana ibyangijwe n’icyorezo cya Coronavirus (COVID-19).

Trump ntiyahwemye gushinja u Bushinwa ko ari bwo bwatumye COVID-19 igira ubukana, kubera ko ngo bwahishe amakuru y’ingenzi ajyanye n’iki cyorezo ndetse n’imibare y’abahitanywe na cyo mu Bushinwa.

Hakomeje kumvikana n’andi makuru ashinja u Bushinwa ko virus itera COVID-19 yaba yarakorewe muri laboratwari yo mu Mujyi wa Wuhan, ahagaragaye bwa mbere abarwayi bayo; gusa nta kirahamya niba byaba byarakozwe ku bushake cyangwa ari impanuka.

Leta Zunze Ubumwe za Amerika zivuga ko zatangiye iperereza ryo ku rwego rwo hejuru, kandi ko nibigaragara ko u Bushinwa bwagize uruhare urwo ari rwo rwose mu kwaduka no gukwirakwira kw’iki cyorezo, buzabiryozwa bikomeye.

Mu kiganiro n’itangazamakuru kuri uyu wa mbere, Perezida Donald Trump yavuze ko barakariye u Bushinwa.

Ati “Iyi ndwara yakabaye yarahagarikiwe aho yadukiye, ntikwirakwire isi yose.”

RFI yanditse ko amagambo ya Trump yari agamije kwihagararaho nyuma y’aho yari aherutse kuvuga ko abantu bakwiye kujya baterwa imiti yica udukoko mu rwego rwo kwirinda COVID-19; ibintu byamaganiwe kure n’abantu batandukanye barimo n’abaganga bakomeye ku isi.

Gushinja u Bushinwa ko ari bwo nyirabayazana w’iki cyorezo cyugarije isi, bamwe babifata nk’intambara y’amagambo yatangijwe na Trump mu rwego rwo kwikura mu isoni nyuma yo kunengwa kudafata ingamba zikwiye mu guhangana na COVID-19.

U Budage nabwo bwunze mu rya Leta Zunze Ubumwe za Amerika buvuga ko buzishyuza Leta y’u Bushinwa miliyari 165 z’amadorali kubera COVID-19.

Trump yavuze ko bakiri gukora imibare yose, bityo ko batari babona igiteranyo cy’akayabo bagomba kwishyuza u Bushinwa, ariko ko ari menshi cyane kuko ibyangijwe na COVID-19 byageze ku isi hose.

Ku rundi ruhande ariko, Perezida Donald Trump anengwa kuba ntacyo yakoze ku ikubitiro, kuko kuva muri Mutarama na Gashyantare 2020, yakiraga amakuru y’ubutasi amwereka ko icyorezo cya COVID-19 gikomeje gukaza umurego, ariko we ntasome raporo cyangwa ngo atege amatwi ibyavugwaga n’abashinzwe ubutasi.

Washington Post yanditse ko Perezida Trump yaburiwe inshuro nyinshi ariko we agakomeza kuvuga ko COVID-19 nta bukana ifite; ibyatumye atinda gushyiraho ibihe bidasanzwe mu gihugu cye none ubu kikaba kiyoboye ibindi byose mu gushegeshwa na COVID-19.

Kugera kuri uyu wa kabiri, tariki ya 28 Mata 2020, Leta Zunze Ubumwe za Amerika zimaze kugaragaramo abanduye COVID-19 basaga 988 470, abamaze guhitanwa n’iki cyorezo bo basaga 56 250, mu gihe abamaze gukira ari 111 583.

Trump akomeje kwijundika u Bushinwa abwishyuza ibyangijwe na Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .