00:00:00 IGIHE NETWORK KN KINYARWANDA EN ENGLISH FR FRANCAIS

TikTok yigaramye ibyo kugurwa na Elon Musk

Yanditswe na Mugisha Christian
Kuya 14 January 2025 saa 08:40
Yasuwe :

TikTok yahakanye amakuru avuga ko u Bushinwa bushobora kwemera kugurisha ibikorwa byayo muri Leta Zunze Ubumwe za Amerika ku munyemari Elon Musk, ivuga ko ari ‘ikinyoma’.

Ibi byatangajwe nyuma y’inkuru ya Bloomberg yavugaga ko bamwe mu bayobozi b’u Bushinwa bari kuganira ku buryo ibikorwa bya TikTok muri Amerika byakwegurirwa X [yahoze yitwa Twitter], mu gihe Urukiko rw’Ikirenga rwaho, rwemeje ko uru rubuga ruhagarikwa burundu muri Amerika cyangwa rukagurishwa rukava mu maboko y’Abashinwa.

Ku butegetsi bwa Perezida Biden, TikTok yashyizwe mu majwi ko yifashishwa n’u Bushinwa mu gutata amakuru muri Amerika, bityo hasabwa ko mu gihe itagurishijwe, igomba guhagarikwa.

TikTok imaze igihe ivuga ko itazagurisha ibikorwa byayo muri Amerika.

Asabwe kugira icyo atangaza kuri aya makuru y’igurishwa, Umuvugizi wa TikTok, yavuze ko “Nta kintu dushobora gutangaza ku makuru y’ibihuha.”

Biteganyijwe ko kwemeza itegeko risaba TikTok kugurisha ibikorwa byayo muri Amerika cyangwa kubihagarika, rizafatwaho umwanzuro n’Urukiko rw’Ikirenga ku wa 19 Mutarama 2025.

Mu kwezi gushize, Donald Trump yasabye uru rukiko gusubika ifatwa ry’umwanzuro ku kibazo cya TikTok, kugeza asubiye mu biro by’umukuru w’igihugu, kugira ngo ashake “umuti ushingiye kuri politiki”.

Yabitangaje nyuma y’ibiganiro yagiranye na Shou Zi Chew, umuyobozi wa TikTok, mu cyumweru gishize.

Umwunganizi we yagejeje ku rukiko impapuro zigaragaza ko Trunp “adashyigikiye ihagarirwa rya TikTok” kandi ko yifuza ko urukiko rutabifataho umwanzuro ari uko yasubiye ku butegetsi kuko yifuza gukemura ikibazo “Binyuze mu nzira za politiki”.

Donald Trump azarahirira kuyobora Amerika ku wa 20 Mutarama 2025.

TikTok yagaragaje ko amakuru avuga ko ibikorwa byayo muri Amerika bigiye kwegurirwa Elon Musk ari ibinyoma

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .