Tesla yaciye agahigo ko gucuruza imodoka nyinshi mu mwaka 2020

Yanditswe na Mukahirwa Diane
Kuya 4 Mutarama 2021 saa 01:05
Yasuwe :
0 0

Uruganda rw’Abanyamerika rukora imodoka zikoreshwa n’amashanyarazi rwa Tesla, rwatangaje ko n’ubwo umwaka wa 2020 wabaye mubi ku bucuruzi bw’imodoka muri rusange, uru ruganda rwacuruje imodoka zigera ku 499 550, ari na zo nyinshi rucuruje kuva rwatangira imirimo yarwo.

Mu ntangiriro z’umwaka ushize, Elon Musk uyobora Tesla yari yavuze ko bifuza ko muri uwo mwaka bagacuruje imodoka 500 000 muri rusange. Abahanga mu by’ubukungu bemeza ko ibyo Tesla yagezeho ari intambwe ikomeye bateye, na cyane ko uruganda rwabo rukuru ruri California muri Amerika rwamaze hafi amezi abiri rudakora mu gihe cy’ingamba za Guma mu Rugo zashyizewho muri iyo Leta ahagana mu mpera za Werurwe kugera mu ntangiriro za Gicurusi.

Tesla iherutse gutaha uruganda mu gihugu cy’u Bushinwa mu mpera za 2019, rwagaragajwe nk’urwatanze umusanzu ufatika mu kongera ingano y’imodoka zicuruzwa na Tesla.

Uku kuzamuka kw’inyungu ya Tesla kwatumye agaciro k’umugabane wayo ku isoko ry’imari n’imigabane kazamukaho 743%, bituma agaciro ka Tesla muri rusange kayingayinga ak’izindi nganda umunani zikomeye mu byo gukora imodoka ziteranyije, harimo uruganda rwa Toyota, Volkswagen, Daimler, General Motors, BMW, Honda, Hyundai na Ford.

Tesla kandi irateganya kubaka izindi nganda mu gihugu cy’u Budage ndetse no muri Leta ya Texas yo muri Leta Zunze Ubumwe za Amerika.

Muri uyu mwaka kandi, biteganyijwe ko Tesla izatangira kugurisha imodoka zayo ku isoko ry’u Buhinde, ari na ryo soko rya gatandatu rinini mu kugura imodoka nyinshi ku Isi, aho binavugwa ko hari umugambi ho kuzahubaka uruganda rukora izi modoka z’amashanyarazi mu myaka iri imbere.

N’ubwo imibare y’imodoka inganda zagurishije uyu mwaka itarajya hanze, mu mwaka wa 2019 uruganda rwa Volkswagen rwari rwagurishije imodoka miliyoni 11, mu gihe General Motors yari yagurishije imodoka miliyoni 7.7.

Uruganda rwa Tesla rwacuruje imodoka nyinshi muri 2020, n'ubwo utari umwaka mwiza ku bucuruzi bw'imodoka muri rusange

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .