00:00:00 IGIHE NETWORK KN KINYARWANDA EN ENGLISH FR FRANCAIS

Tanzania yahawe inkingo za COVID-19, OMS yagaragaje ko abasaga miliyoni 200 bazandura Delta: Avugwa mu mahanga

Yanditswe na IGIHE
Kuya 25 Nyakanga 2021 saa 12:16
Yasuwe :
0 0

Tanzania yahawe dose z’inkingo za COVID-19 zisaga miliyoni na Leta Zunze Ubumwe za Amerika mu rwego rwo guhangana n’icyorezo binyuze mu gukingira abanya-Tanzaniya.

Izi nkingo zije mu gihe ibihugu binyuranye bikomeje kurwana inkundura yo gukingira abaturage babyo ku bwinshi kugira ngo bace intege umuvuduko w’icyorezo cya Covid-19.

Ambasaderi wa Leta Zunze Ubumwe za Amerika muri Tanzania, Donald Wright yavuze ko, iyi nkunga igamije kurengera ubuzima bw’Abanya-Tanzania.

Ati “Twatanze izi nkingo tugamije gukiza ubuzima no gutuma Isi irangiza uru rugamba. Gutanga izi nkingo kandi ni uburyo bwo gukomeza gushimangira umubano w’imyaka 60 dufitanye na Tanzania.”

Minisitiri w’Ubuzima muri iki gihugu, Dr Dorothy Gwajima, yavuze ko izi nkingo zizakoreshwa mu gukingira abakozi bo mu nzego z’ubuzima, abageze mu zabukuru n’abandi bafite ibyago byinshi byo kwandura.

Ati “Tuzamenyesha ibigo nderabuzima aho inkingo zizaba zageze n’ingamba zizagenderwaho mu kuzitanga. Guverinoma iri guharanira ko buri muturage abona urukingo kandi ku buntu.”

Iki gihugu cyabaye nk’igikererwa mu rugendo rwo gukingira Coronavirus, ahanini bitewe n’uko John Pombe Magufuli wakiyoboraga atakozwaga ibijyanye no kwirinda iki cyorezo no kuba yashaka inkingo zo guha abaturage.

Tanzania yifuza gukingira byibuze 60% by’abaturage bayo. Iteganya ko miliyoni 11 z’abaturage bangana na 20% bazakingirwa binyuze muri gahunda ya Covax.

Tanzania yahawe inkingo za COVID-19, OMS yagaragaje ko abasaga miliyoni 200 bazandura Delta: Avugwa mu mahanga

U Bufaransa: Imyigaragambyo y’abadashaka amabwiriza mashya ya COVID-19 yakajije umurego

Umubare w’abitabira imyigaragambyo y’abadashyigikiye amabwiriza mashya yashyizweho na Guverinoma y’u Bufaransa mu kwirinda ikwirakwira rya COVID-19 ukomeje kwiyongera ari nako igera mu bice bitandukanye by’iki gihugu.

Abigaragambya ni abatemeranya n’amabwiriza mashya yashyizweho arimo n’avuga ko guhera ku wa 15 Nzeri abakora mu bitaro, amavuriro n’ahandi hantu hahurira abantu benshi bagomba kwikingiza bitagenda gutyo bakaba bafatirwa icyemezo cyo kutishyurwa.

Aya mabwiriza kandi avuga ko guhera mu kwezi gutaha abantu bazajya basabwa kwerekana icyangombwa cy’uko bakingiwe cyangwa nta COVID-19 bafite kugira ngo bajye mu kabari, mu maduka, mu nzu zerekanirwamo sinema ndetse no muri gari ya moshi.

Mu ijoro ryo ku wa Gatandatu, ubukana bw’iyi myigaragambyo bwarushijeho kwiyongera kuko bashyamiranye na polisi kugeza aho hitabazwa imyuka iryana mu maso n’amazi mu kubatandukanya.

Abigaragambya bari bafite ibyapa biriho ubutumwa bugaragaza ko batishimiye guverinoma y’u Bufaransa burimo n’ubugira buti “Muhagarike igitugu”.

Kuri uyu munsi iyi myigaragambyo yitabiriwe n’abagera kuri 161,000, mu gihe mu cyumweru gishize yari yitabiriwe n’abantu 114,000. Iyi myigaragambyo ikorerwa mu mijyi nka Marseille, Montpellier, Nantes na Toulouse.

Aba baturage bakomeje kwigaragambya mu gihe Guverinoma y’u Bufaransa yatangaje ko iki gihugu cyamaze kwinjira mu nkundura ya kane y’icyorezo cya COVID-19, aho imibare y’abandura n’abahitanwa n’iki cyorezo yongeye kuzamuka.

Imyigaragambyo y’abadashaka amabwiriza mashya ya COVID-19 mu Bufaransa yakajije umurego

OMS yagaragaje ko abandura Delta bazagera kuri miliyoni 200

Ishami ry’Umuryango w’Abibumbye rishinzwe kwita ku Buzima, OMS ryagaragaje ko mu minsi iri imbere ubwoko bushya bwa Coronavirus buzwi nka ‘Delta’ ari bwo buzaba bwiganje mu barwayi ba COVID-19 kurenza ubundi bwose.

Delta ni ubwo bwa Coronavirus bwagaragaye bwa mbere mu Buhinde, bufite umwihariko wo kwandura vuba no kuzahaza abantu kurenza ubundi bwoko bwose.

OMS yagaragaje ko mu byumweru bike abasaga miliyoni 200 bazaba bamaze kwandura ubu bwoko bushya, umubare uruta uw’abamaze kwandura COVID-19 ku Isi yose kuko basaga miliyoni 194.

Yakomeje ivuga ko ibi birushaho gutera impungenge ko umubare w’abicwa n’iki cyorezo uzakomeza kwiyongera.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .