Signal na Telegram zikomeje kuyobokwa na benshi binubira amabwiriza mashya ya WhatsApp

Yanditswe na Ndahayo Emmanuel
Kuya 16 Mutarama 2021 saa 09:15
Yasuwe :
0 0

Umubare w’abifuza gukoresha porogaramu ya Signal na Telegram ukomeje kuzamuka ku kigero cyo hejuru, nyuma y’uko WhatsApp isanzwe ikoreshwa na miliyari zirenga ebyiri mu mpera z’umwaka ushize ishyizeho amabwiriza mashya, asaba abayikoresha kuyiha uburenganzira bwo kuzajya isangiza amakuru yabo n’ikigo cya Facebook, ari na cyo kiyigenzura.

Ni amabwiriza atarakiriwe neza n’abakoresha WhatsApp ku Isi kuko baketse ko iki kigo gishaka kuzajya gitanga amakuru yabo kugira ngo akoreshwe mu kubamamazaho ibintu bitandukanye, nk’uko Facebook isanzwe ibigenza ku bayikoresha.

Ku bw’izo mpamvu, abari basanzwe bakoresha WhatsApp batangiye gushaka izindi mbuga nkoranyambaga bakoresha ariko zidakoresha amakuru yabo mu bindi bikorwa, ari cyo cyatumye urubuga rwa Signal na Telegram, na zo zikoreshwa mu guhererekanya ubutumwa nka WhatsApp, ziganwa na benshi.

Kuri uyu wa gatanu, urubuga rwa Signal rwongeye gutangaza ko rwagize ikibazo cy’ikoranabuhanga bitewe n’umubare munini cyane w’abantu bashakaga kumanura (download) porogaramu yabo.

Ni ubwa kabiri iki kibazo kibaye kuri Signal mu gihe kitarenze ibyumweru bibiri gusa.
Bavuze ko bari gukora ibishoboka byose ku buryo “iki kibazo kiza kurangira mu gihe gito”, bongeraho ko kuba abantu benshi bakomeje kwifuza gukoresha porogaramu yabo “ari ubutumwa bwatanzwe n’abantu ko baha agaciro amakuru yabo”.

Ikoreshwa rya Signal kandi ryarushijeho gufata indi ntera mu minsi ishize ubwo Umuyobozi w’uruganda rukora imodoka zikoresha amashanyarazi, Tesla, akaba n’umuherwe wa mbere ku Isi, Elon Musk, yabwiraga abantu yifashishije Twitter ko “bakoresha Signal” bakayisimbuza WhatsApp.

Imibare y’abantu bamanuye porogaramu ya Signal mu cyumweru cya mbere y’uko WhatsApp itangaza amavugurura mashya ingana n’abantu 246 000, ariko yaratumbagiye igera kuri miliyoni 8.8 mu cyumweru cyakurikiye amabwiriza mashya ya WhatsApp. Nko mu Buhinde, kimwe mu bihugu bikoreshwamo WhatsApp kurusha ibindi ku Isi, iyi mibare yaratumbagiye cyane igera kuri miliyoni 2.7, ivuye ku bantu ibihumbi 12 mu cyumweru cyari cyabanjirije itangazwa ry’amabwiriza mashya ya WhatsApp.

Ibi kandi ni ko byagenze mu bihugu birimo Amerika, aho imibare yavuye ku bantu ibihumbi 63 ikagera kuri miliyoni 1,1. No mu Bwongereza iyi mibare yazamutse, igera ku bantu ibihumbi 191 ivuye ku bantu 7 400, n’ubwo u Bwongereza n’u Burayi bitarebwa n’aya mabwiriza.

Ku rundi ruhande, urubuga rwa Telegram na rwo rwaraganwe cyane muri iyi minsi, kuko abamanuye porogaramu yarwo bageze kuri miliyoni zirenga 11, mu cyumweru cyakurikiye itangazwa ry’ibyemezo bya WhatsApp, zivuye kuri miliyoni 6.5 mu cyumweru cyari cyabanje, bigatuma umubare w’abakoresha urwo rubuga urenga miliyoni 500 ku Isi yose.

Ku rundi ruhande, umubare w’abamanura WhatsApp waraguye, uva kuri miliyoni 11 ugera kuri miliyoni 9 mu cyumweru cyakurikiye itangazo ryabo.

WhatsApp kandi yatangaje ko yongereye igihe yari buzavane abataremeza amabwiriza ku murongo, ikigeza ku wa 15 Gicurasi, aho bavuga ko bazakoresha iki gihe mu rwego rwo gutanga amakuru y’ukuri kuri izi mpinduka.

Uru rubuga kandi ruvuga ko amakuru ruzajya rusangira na Facebook atarimo ubutumwa buhererekanywa kuri WhatsApp, ahubwo ko ari amazina y’ukoresha WhatsApp, aho aherereye, ubwoko bwa telefoni akoresha, nimero ye ya telefoni n’amakuru ajyanye n’ubwishyu bwose yakoze akoresheje WhatsApp, ibi ariko bikareba abari mu bihugu WhatsApp yatangiye gukoreshwa mu kwishyurana, birimo u Buhinde.

Umubare w'abakoresha Signal ukomeje kwiyongera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .