Saudi Amarco yabaye ikigo cya mbere ku Isi kigize agaciro ka miliyari $2000

Yanditswe na Iradukunda Serge
Kuya 13 Ukuboza 2019 saa 11:54
Yasuwe :
0 0

Kompanyi itunganya ikanacuruza ibikomoka kuri peteroli ya Saudi Amarco, yahigitse uruganda rukora ibikoresho by’Ikoranabuhanga rwa Apple, iba ikigo cya mbere ku Isi kibashije kugira agaciro ka miliyari $2000.

Ibi iki kigo cyo muri Arabie Saoudite kibigezeho nyuma y’uko agaciro k’imigabane yacyo kazamutse ku isoko ry’imari n’imigabane ku kigero cya 10%, ku buryo kugeza kuri uyu wa Kane umugabane muri iki kigo wari ufite agaciro ka $10.32.

Umuyobozi wa Saudi Armaco, Yasir Othman Al-Rumayyan nyuma yo guca aka gahigo yavuze ari ibintu biteye ishema, nk’uko CNN yabitangaje.

Yagize ati "Iri ni ishema ndetse n’ibihe by’amateka kuri Saudi Armaco, ku banyamigabane no ku bwami, kuba Saudi Armaco itangiye ubuzima nk’ikigo kiyoboye urutonde rw’isoko ry’imari n’imigabane muri Arabie Saoudite”.

Saudi Armaco ihigitse uruganda rwa Apple kuri ubu rufite agaciro ka miliyari $1200.

Kuri ubu imigabane imaze kugurishwa muri iki kigo ingana na 1.5%, leta ikaba isigaranye ingana na 98.5%.

Kugurisha imigabane y’iyi kigo byari igitekerezo cy’igikomangoma Mohammed Bin Salman binyuze mu bukangurambaga bumaze imyaka ine, bugamije kugurisha imigabane muri iki kigo, kugira ngo havugururwe ubukungu bwa Arabie Saoudite ntibushingire ku bikomoka kuri peteroli gusa.

Gusa nubwo iki kigo giciye agahigo ko kuba ariyo ubu gihenze ku Isi, abahanga mu by’ubukungu bagaragaza ko hari imbogamizi z’uko abaguze imigabane n’ubundi ari abenegihugu ba Arabie Saoudite, bitandukanye n’intego iki gihugu cyari gifite yo gukurura abashoramari b’abanyamahanga.

Uyu mugambi waje gukomwa mu nkokora n’urupfu rw’umunyamakuru Jamal Khashoggi wiciwe muri Turikiya maze iki gihugu kigashinjwa urupfu rwe, ibintu byatumye gitakarizwa icyizere n’abashoramari.

Saudi Aramco yabaye ikigo cya mbere gihenze ku Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza