00:00:00 IGIHE NETWORK KN KINYARWANDA EN ENGLISH FR FRANCAIS

Ruswa iranuma mu Nteko ya EU, Depite Marie Arena yeguye

Yanditswe na IGIHE
Kuya 12 Mutarama 2023 saa 03:18
Yasuwe :

Ruswa ikomeje kugamburuza Abadepite mu Nteko Ishinga Amategeko y’u Burayi. Depite Maria Arena, yeguye ku mirimo yo kuyobora komisiyo y’iyi nteko ishinzwe uburenganzira bwa muntu, yijundika itangazamakuru n’abo batavuga rumwe kumugabaho ibitero mu nkundura ya ruswa bikekwa ko yatanzwe na Qatar.

Ukwegura kwa Maria Arena kubayeho nyuma y’amasaha make ikinyamakuru Politico, gitangaje inkuru icukumbuye kuri komisiyo ye bigahishurwa ko uyu mugore atigeze amenyekanisha ko yategewe indege z’ubuntu akanishyurirwa icumbi na Qatar. Ni ingendo yakoze ziva n’izijya i Doha tariki 8 na 9 Gicurasi umwaka ushize.

Arena kandi ashinjwa kutamenyekanisha ingendo yakoreye muri Lebanon na Burkina Faso zose zishyuwe na Guverinoma ya Qatar.

Arena yemera ko yakoze ingendo mu bihugu bitatu agashinja umunyamabanga we kutazimenyekanisha kuko atari abizi ko ari ngombwa. Komisiyo yayoboraga ubu ni izingiro ry’ibirego bya ruswa n’iyezandonke.

Mu itangazo Maria Arena yoherereje ibiro ntaramakuru by’Ababiligi, Belga, yavuze ko yeguye kugira ngo arinde isura ye ndetse n’imirimo yakozwe na komisiyo y’uburenganzira bwa muntu mu nteko ishinga amategeko ya EU.

Yahakanye ko mu buryo bwose hari isano afitanye na ruswa yatanzwe na Qatar mu nteko ishinga amategeko ya EU. Ati “Ariko kubera ibitero by’itangazamakuru n’abo duhanganye muri politiki byangije isura yanjye ndetse n’ibikorwa byakozwe na Komisiyo, mfashe icyemezo cyo kwegura ku mwanya wa Perezida wa komisiyo”.

Komisiyo Maria Arena yayoboraga kuva mu 2019, ifite aho ihuriye cyane n’abarimo gukorwaho iperereza ry’ibanze n’inzego z’u Bubiligi barimo Pier Antonio Panzeri wayoboye iyi komisiyo mbere.

Maria Arena ni Umudepite w’umubiligi ukunze kwibanda cyane ku bibazo bya Congo ariko cyane cyane akunze gushyira mu majwi u Rwanda. Umunyamabanga we bakoranaga cyane ku bibazo bya Afurika na Repubulika Iharanira Demokarasi ya Congo, arimo gukorwaho iperereza.

Imvugo ze ziganjemo kwibasira cyane u Rwanda. Ubwo umutwe wa M23 wuburaga imirwano, uyu mugore yanywanye n’ubutegetsi bwa RDC, ahagurukana imizi n’imiganda ashinja u Rwanda gufasha M23 imaze amezi hafi atanu yigaruriye Umujyi wa Bunagana.

Ni mu gihe abagize uyu mutwe bo bagaragaza ko icyo bashaka ari uko Leta ya Congo yubahiriza ibyo basezeranye mu 2013 n’ubu bitarashyirwa mu bikorwa.

Mu Ugushyingo uyu mwaka ubwo yari mu Nteko Ishinga Amategeko, Marie Arena, yahagaze imbere ya bagenzi be avuga ko M23 ifashwa n’u Rwanda yatangije ibitero ku ngabo za Congo bishyira igihugu mu ihohoterwa ndengakamere kandi umutungo kamere ari wo ntandaro y’ibi bikorwa.

Ntibyatinze vuba aha EU yemera gutanga inkunga ya miliyoni 20 z’amayero izashyigikira ibikorwa by’ingabo z’u Rwanda muri Mozambique, mu ntara ya Cabo Delgado. Ni icyemezo gishingiye ku bufatanye bw’impande zombi bwo gushakira umuti ibibazo by’umutekano hirya no hino muri Afurika.

Nk’ibisanzwe, Marie Arena yarahagurutse anenga cyane iki cyemezo cya EU agira ati “Gufata icyemezo cyo gutanga miliyoni 20 z’amayero zo gushyigikira ingabo z’u Rwanda hatabanje kuzisaba guhagarika ubufasha ziha M23, ntabwo byemewe”.

Abakurikiranira hafi imvugo za Marie Arena ku Rwanda, bazihuza cyane na ruswa umunyamabanga we ashinjwa, bakibaza niba uyu munyamabanga atari ikiraro cyanyuzwagaho akayabo RDC yishyura Marie Arena ngo ayitakambire aharabika u Rwanda. Reka amaso tuyahange iperereza.

Marie Arena yeguye ku mwanya w'umuyobozi wa komisiyo ya EU ishinzwe uburenganzira bwa muntu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .