Puderi z’abana za Johnson & Johnson zasubijwe ku ruganda nyuma yo kwikangwamo asbestos

Yanditswe na IGIHE
Kuya 18 Ukwakira 2019 saa 08:42
Yasuwe :
0 0

Uruganda rukomeye rwa Johnson & Johnson, rwahamagaje amacupa ibihumbi 33 ya puderi z’abana, asubizwa mu ruganda nyuma y’ibimenyetso byagaragaje ko mu icupa rimwe ryaguriwe kuri internet muri Leta Zunze Ubumwe za Amerika, habonetsemo ingano nke y’ikinyabutabire cya asbestos gishobora gutera kanseri.

Nubwo icyo kinyabutabire cyatahuwe mu icupa rimwe, uru ruganda rwatangaje ko rwatangije iperereza ndetse mu isesengura ryimbitse ryageragejwe inshuro zitandukanye, nta yandi macupa yabonetsemo icyo kinyabutabire.

Uku guhamagaza ibi bicuruzwa bije mu gihe uru ruganda rukomeje guhangana n’ibirego binyuranye, nyuma yo gusanga hari bimwe mu bicuruzwa byarwo byateye abantu kanseri. Ni ibirego Johnson & Johnson yakomeje guhakana.

Uru ruganda rwavuze ko rwahamagaje amacupa menshi ya puderi z’abana yakozwe ndetse akoherezwa ku masoko ya Amerika mu 2018, mu rwego rwo gucukumbura neza iki kibazo no kwirinda ko hari ingaruka zindi zabaho.

Johnson & Johnson ikomeje no gukorana n’Ikigo gishinzwe Imiti n’Ibiribwa muri Amerika, ngo hasuzumwe neza umwimerere w’ibizamini byagaragaje ko mu icupa ryasuzumwe mbere habonetsemo ikinyabutabire cya asbestos, hanarebwe niba iryo cupa ritaba ryari iryiganano cyangwa niba ritari ryarangiritse.

Rwakomeje ruti “Imyaka ishize y’amasuzuma ndetse n’ayakozwe na FDA ku nshuro zitandukanye harimo n’ayakozwe mu kwezi gushize, nta asbestos yasanzemo.”

Uruganda rwa Johnson & Johnson ntirworohewe muri iyi minsi, nyuma y’uko muri uku kwezi rwaciwe miliyari 8$ nk’impozamarira y’umugabo wakoresheje umuti wakozwe n’uru ruganda, ukamugiraho ingaruka zirimo gukura kw’amabere.

Puderi z’abana za Johnson & Johnson zasubijwe ku ruganda nyuma yo kwikangwamo asbestos

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza