Perezida Trump yavuze ko kwima intwaro Arabie Saoudite byaba ari ukwihima

Yanditswe na Ferdinand Maniraguha
Kuya 14 Ukwakira 2018 saa 10:06
Yasuwe :
0 0

Perezida wa Leta Zunze Ubumwe za Amerika Donald Trump yavuze ko badashobora guhanisha Arabie Sudite kuyima intwaro ngo kuko ari bo babihomberamo.

Arabie Soudite imaze iminsi ku gitutu cy’amahanga nyuma y’uko bivuzwe ko umunyamakuru Jamal Khashoggi utaravugaga rumwe n’ubwami bw’icyo gihugu yiciwe muri Ambasade yacyo muri Turukiya.

Khashoggi yabuze tariki 2 Ukwakira nyuma yo kwinjira muri Ambasade ya Arabia Saoudite mu mujyi wa Istanbul. Turukiya yemeza ko uwo munyamakuru yiciwe muri ambasade.

Trump ari ku gitutu cy’amahanga cyo gufatira Arabie Saoudite ibihano nibiramuka byemejwe ko Khashoggi yishwe.

Bamwe mu bagize Inteko Ishinga Amategeko ba Amerika basabye ko Arabie Saoudite ifatirwa ibihano birimo no kwimwa intwaro.

Kuri uyu wa Gatandatu, Trump usanzwe afitanye umubano mwiza n’icyo gihugu yavuze ko baramutse bagifatiye ibihano ingaruka nyinshi zaba kuri Amerika.

Yagize ati “Nkeka ko twaba twihannye turamutse tubikoze. Ahubwo hari ibindi bintu twakora bikomeye, kandi tuzabikora.”

Trump yavuze ko icyo gihugu cyemeye kugurira Amerika intwaro za miliyari 110 z’amadolari, kikaniyemeza gushora imari muri Amerika ku buryo kugifatira ibihano byaba ari igihombo.

Ati “Nibatazigura hano, babazigura mu Burusiya cyangwa mu Bushinwa. Mutekereze izo miliyari $110, barahita bazijyana mu bindi bihugu , nkeka ko rero byaba ari ubusazi.”

Ntabwo ibindi bihano bikomeye Trump yavuze ko bafatira Arabie Saoudite biramenyekana nk’uko Reuters yabitangaje.

Icyo gihugu gikungahaye kuri peteroli, gisanzwe ari inshuti ikomeye y’ubutegetsi bwa Trump.

Mu kwezi gutaha Amerika irateganya gufatira ibihano ubucuruzi bwa peteroli bwa Iran kandi irateganya ko Arabie Saoudite ariyo izajya igemura peteroli Iran yatangaga.

Trump yasezeranyije ko araza kuganira n’umwami wa Arabie Saoudite bakavugana uko ibintu bihagaze.

Trump aganira n'umwami wa Arabie Saoudite, Mohammed bin Salman

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza