Perezida Trump yatangaje ko atazitabira irahira rya Joe Biden

Yanditswe na Akayezu Jean de Dieu
Kuya 8 Mutarama 2021 saa 06:37
Yasuwe :
0 0

Perezida ucyuye igihe wa Leta Zunze Ubumwe za Amerika, Donald Trump yatangaje ko atazitabira ibirori by’irahira rya Joe Biden uherutse gutsinda amatora yo kumusimbura.

Trump atangaje ibi nyuma y’amasaha make yemeye ku mugaragaro ko yatsinzwe amatora ndetse yiteguye ihererekanya butegetsi rikozwe mu mahoro.

Ubutumwa yanyujije ku rukuta rwe rwa Twitter kuri uyu wa Gatanu bugira buti “Ku bantu bose babimbajije, ntabwo nzajya mu irahira ryo ku wa 20 Mutarama.”

Kuva hatangazwa mu buryo bw’agateganyo ko Biden yatsinze amatora, Trump bari bahanganye [yashakaga manda ya kabiri] ntabwo yigeze yemera ibyavuye mu matora ndetse yakunze kumvikana avuga ko habayeho ubujura bw’amajwi.

Ibi byatumye abamushyigikiye bakora imyigaragambyo ubwo abagize Inteko Ishinga Amategeko bari bagiye gutangaza mu buryo bwa burundu, uwatsinze amatora. Yabanje kubashyigikira ariko yokejwe igitutu yisubiraho.

Mu ijambo Perezida Donald Trump yagejeje ku Banyamerika ku wa 7 Mutarama, yanenze cyane ibikorwa by’abamushyigikiye bagiye kwigaragambiriza mu Nteko Ishinga Amategeko avuga ko badahagarariye isura ya Amerika mu bijyanye na Demokarasi.

Perezida Trump yakomeje avuga ko ibyo yakoze byose ubwo atemeraga ibyavuye mu matora byari bigamije guharanira demokarasi.

Uyu mugabo utarabashije kwegukana manda ye ya kabiri yibukije Abanyamerika ko iki ari igihe cyo komorana ibikomere no kwiyunga, yemeza ko ari umwanya mwiza wo kugira ngo bafatanyirize hamwe mu guhangana n’ibibazo umwaka wa 2020 wabasigiye birimo n’icyorezo cya COVID-19.

Trump yiyongereye ku rutonde rw’abandi bantu bake bayoboye Amerika bagiye banga kwitabira imihango yo guhereza ubutegetsi abasimbuye barimo Richard Nixon mu 1974, Andrew Johnson mu 1869, John Quincy Adams mu 1829 na John Adams mu 1801.

Trump yatangaje ko atazitabira umuhango wo kurahira kwa Biden

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .