Perezida Trump amaze gukusanya asaga miliyoni $100 azamufasha kwiyamamaza mu 2020

Yanditswe na Ishimwe Israel
Kuya 16 Ukwakira 2018 saa 03:36
Yasuwe :
0 0

Perezida wa Leta Zunze Ubumwe za Amerika, Donald Trump amaze gukusanya arenga miliyoni $100 azifashisha mu bikorwa byo kwiyamamariza kuyobora iki gihugu cy’igihangange muri manda ya kabiri, mu 2020.

Iki gikorwa yagitangiye mu gihe habura imyaka ibiri ngo manda yatorewe mu 2016 ahigitse Hillary Clinton, igere ku musozo.

Amatora ya 2020 ashobora kuzitabirwa n’abo mu Ishyaka ry’Aba-Démocrates bakomeye. Joseph Robinette Biden Jr. [Joe Biden] wabaye Visi Perezida wa 47 wa Amerika, ari mu bazatangaza niba azayiyamamaza bitarenze Mutarama 2019.

CNN yanditse ko Trump yakusanyije miliyoni $18 hagati ya Nyakanga na Nzeri binyuze muri Komite ye ishinzwe ibikorwa byo kwiyamamaza n’indi mishinga yifashisha.

Imibare yatangajwe n’Ikigo cyigenga kigenzura imari ishorwa mu matora, igaragaza ko uyu mukuru w’igihugu amaze gukusanya miliyoni $106.

Mu kwezi gushize ibikorwa byo gukusanya inkunga byasojwe Trump agejeje miliyoni $35.4 kuri banki.

Umuyobozi ushinzwe Ibikorwa byo kwiyamamaza kwa Trump, Lara Trump yasohoye itangazo asaba abaturage gushyigikira Se.

Yagize ati “Nyuma y’amezi 20 amaze mu biro hari impinduka nyinshi mu bijyanye no kubungabunga amahoro n’ubukungu muri Amerika. Perezida Trump yatanze umusaruro w’ibyo yasezeranyije.”

Donald John Trump w’imyaka 72 yagaragaje inyota yo kongera kwiyamamaza akigera ku butegetsi ku wa 20 Mutarama 2017. Yatangiye ibikorwa byo gukusanya inkunga mu mezi ya mbere ari muri Perezidansi.

Barack Obama yasimbuye we yategereje umwaka wa gatatu wa manda ye mbere yo gutangira gukusanya inkunga yo kongera kwiyamamaza.

Perezida Trump ageze kure imyiteguro yo kwiyamamariza manda ya kabiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza