Perezida Kim Jong Un yuriye umusozi mutagatifu ari ku ifarasi

Yanditswe na Ferdinand Maniraguha
Kuya 17 Ukwakira 2019 saa 08:14
Yasuwe :
0 0

Perezida wa Koreya ya Ruguru, Kim Jong Un yuriye umusozi wa mbere muremure muri icyo gihugu ufatwa nk’umusozi mutagatifu, ahetswe n’ifarasi.

Amafoto yashyizwe hanze n’ikinyamakuru KCNA cyo muri Koreya ya Ruguru, agaragaza Perezida Kim ahetswe n’ifarasi ku musozi wa Paektu wuzuyeho urubura.

Abasesenguzi bavuze ko atari ubwa mbere Kim yuriye uwo musozi ufite uburebure bwa metero 2750, ahubwo bahishura ko inshuro zose yagiye awurira yabaga afite ikintu kidasanzwe agiye gutangaza.

Ni umusozi ufite amateka yihariye muri icyo gihugu kuko niwo ufatwa nk’uwavukiyeho se wa Kim Jong Un.

Ikinyamakuru KCNA cyatangaje ko kuba Kim yuriye uwo musozi ari amateka adasanzwe mu mpinduramatwara y’icyo gihugu.

Amakuru avuga ko yahakuye imbaraga zituma akomeza kugira Koreya ya Ruguru igihugu cy’igihangange nk’uwo musozi, nkuko abakurambere be babiharaniye.

Mu 2017 yasuye uwo musozi, hashize ibyumweru bike acana umubano na Koreya y’Epfo.

Ntabwo biramenyekana icyo Kim yaba ashaka gukora dore ko ibiganiro na Leta Zunze Ubumwe za Amerika bigikomeje hagamijwe ko igihugu cya Kim gisenya ahakorerwa n’ahageragerezwa intwaro kirimbuzi, ku nyungu z’uko Koreya ikurirwaho ibihano yafatiwe ku rwego mpuzamahanga.

Kim yahaye Amerika kugeza mu mpera z’uyu mwaka, bakaba bamugaragarije inyungu azabikuramo n’uburyo bizakorwamo, bitaba ibyo agakomeza gucura intwaro kirimbuzi.

Hari abatangaje ko kurira uwo musozi, ashobora kuba ari gukangura Amerika yasaga n’iyitaye ku bindi bibazo mpuzamahanga biyibangamiye iri gutera umugongo Koreya ya Ruguru.

Umusozi wa Paektu ni ikirunga kitarazima uvugwaho kuba ivuko rya Dangun wahanze ubwami bwa Koreya mu myaka 4 000 ishize.

Uherere mu magana y’ibirometero uvuye mu murwa mukuru Pyongyang, ukaba uri ku rubibi rwa Koreya ya Ruguru n’u Bushinwa.

Inshuro zose Kim yagiye yurira uyu musozi yabaga afite ikintu kidasanzwe agiye gutangaza.
Umusozi wa Paektu Kim yuriye ni ikirunga kitarazima uvugwaho kuba ivuko rya Dangun wahanze ubwami bwa Koreya mu myaka 4 000 ishize.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza