Ibi bibaye mu gihe mu 2023, Urukiko mpuzamahanga mpanabyaha (ICC) ruheruka gushyira hanze icyemezo cyo guta muri yombi Putin kubera amakimbirane akomeje kuba hagati y’u Burusiya na Ukraine.

Ubwo yari mu kiganiro n’abanyamakuru kuri uyu wa kane tariki 8 Kanama 2024 akabazwa niba igihugu cye cyemera ubusabe bwa Ukraine yasubije ko atari bo babifite mu nshingano guta muri yombi Perezida Putin.

Lopez Obrador yagize ati "Ntidushobora kubikora, ntabwo ari twe bireba.”

Ikinyamakuru Izvestia cya Mexique tariki 7 Kanama 2024 cyatangaje ko Ambasade ya Mexique mu Burusiya yemeje ko yoherereje Perezida Putin ubutumire bwo kwitabire ibi birori ariko akaba atarafata umwanzuro niba azabyitabira cyangwa ashobora kuzahitamo gutuma umuyobozi uzamuhagararira ndetse ubu butumire banabwoherereje Perezida Vlodymyr Zelensky.

Ambasade ya Ukraine muri Mexique yashimiye iki gihugu kubw’ubutumire ndetse yibutsa Guverinoma y’iki gihugu ko Putin ashakishwa na ICC.

Mu itangazo yashyize hanze ku wa gatatu, ryaragiraga riti "Twizeye ko Guverinoma ya Mexique izubahiriza icyemezo mpuzamahanga cyo guta muri yombi Putin agashyikirizwa urwego rw’ubucamanza rwa Loni mu mujyi wa Haye uherereye mu Buholandi".

Mexique yafashe icyemezo cyo kutagira uruhande ibogamiraho mu ntambara iri hagati y’u Burusiya na Ukraine, aho Perezida Lopez Obrador yagaye ingabo za Amerika ku nkunga zageneye Ukraine ndetse n’ibihano Ibihugu by’Uburengerazuba byafatiye u Burusiya.