00:00:00 IGIHE NETWORK KN KINYARWANDA EN ENGLISH FR FRANCAIS

Pakistan: Gutumiza ibikoresho bihenze mu mahanga byakumiriwe kubera ihungabana ry’ubukungu

Yanditswe na IGIHE
Kuya 21 May 2022 saa 10:11
Yasuwe :

Guverinoma ya Pakistan, yatangaje ko igiye guhagarika ibikoresho by’agaciro yakuraga mu mahanga mu rwego rwo guhangana no kuzamura ubukungu bw’igihugu budahagaze neza.

Mu bizahagarara gutumizwa mu mahanga harimo imodoka z’ubwoko bugera kuri 30 n’imbuto zitunganyijwe.

Pakisitan yibasiwe n’imyenda y’umurengera, igabanuka ry’amafaranga y’amahanga ndetse n’itakazagaciro k’ifaranga ry’igihugu.

Kugeza ku wa Kane w’iki cyumweru ama-rupies 200 akoreshwa muri iki gihugu yavunjaga idolari rimwe ry’Abanyamerika.

Mu butumwa yanyujije kuri Twitter, Minisitiri w’Intebe wa Pakistan, Shehbaz Sharif, yavuze ko guhagarika gutumiza ibikoresho bihenze mu mahanga bizafasha mu kubungabunga ubukungu bw’igihugu.

Iki cyemezo kirareba cyane abayobozi mu nzego nkuru z’igihugu, mu bibujijwe harimo telefone n’imodoka biri mu byinjizwa cyane muri iki gihugu hamwe n’ibikoresho by’ubwiza ndetse n’ibiribwa bikomoka ku mbuto bibikwa igihe kirekire.

Minisitiri w’Itangazamakuru, Marriyum Aurangzeb, yabwiye abanyamakuru ko iri kumira rigiye guhita rishyirwa mu bikorwa, aho afite icyizere ko rizatanga umusaruro.

Yagize ati “Tuzaba dushobora kuzigama miliyari esheshatu nidushyiraho ikumirwa ry’ibicuruzwa bihenze. Iki cyemezo kizatuma ubukungu n’inganda by’imbere mu gihugu bizamuka.”

Nubwo bimeze bityo, abakurikirana iby’ubucuruzi bavuze ko igihugu gikwiye kubanza kumvikana n’Umuryango Mpuzamahanga w’Ubucuruzi, ugenzura iby’ubucuruzi mpuzamahanga.

Muri iki gihe muri Pakisitan icyuho mu bucuruzi kigera kuri miliyari 39,2 z’amadolari.

Imran Khan wari Minisitiri w’Intebe mu kwezi gushize yakuweho nk’imwe mu nkurikizi yo kunanirwa gushyira ku murongo izamuka ry’ikiguzi cy’ubuzima n’ibiciro by’ibikoresho by’ibanze.

Abategetsi bo muri Pakistan bari mu biganiro n’Ikigega Mpuzamahanga cy’Imari, FMI muri Qatar basaba guhabwa inguzanyo zashyizweho umukono na Imran Khan mu 2019 zigera kuri miliyari esheshatu z’amadolari ya Amerika. Muri zo Pakistan imaze guhabwamo miliyari eshatu gusa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .