00:00:00 IGIHE NETWORK KN KINYARWANDA EN ENGLISH FR FRANCAIS

OMS yasabye ibihugu bikize gusubika itangwa ry’urukingo rwa gatatu rwa Covid-19

Yanditswe na Umwali Zhuri
Kuya 4 Kanama 2021 saa 07:04
Yasuwe :
0 0

Ishami ry’Umuryango w’Abibumbye ryita ku Buzima, OMS, ryasabye ibihugu biteye imbere kuba bisubitse umugambi wo gutanga urukingo rwa gatatu kugera nibura mu mpera za Nzeri, mu rwego rwo kugira ngo ibihugu biri mu nzira y’amajyambere bibanze bikingire nibura 10% by’abaturage babyo.

Umuyobozi wa OMS, Tedros Adhanom Ghebreyesus, yavuze ko ibihugu bikize biramutse byemerewe gutera urukingo rwa gatatu mbere y’ibihugu bikennye, byagira ingaruka ku ikwirakwiza ry’inkingo mu bihugu bikennye.

Yagize “OMS irasaba ko itangwa ry’urukingo rwa gatatu biba bisubitswe kugera nibura mu mpera za Nzeri, kugira ngo buri gihugu nibura gikingire 10% by’abaturage bacyo. Kugira ngo ibyo bigerweho, hakenewe uruhare rwa buri wese cyane cyane ibihugu bikize n’ibigo bikora inkingo.”

Mu nkingo miliyari enye zimaze gutangwa, 80% byazo byatanzwe mu bihugu bikize, nyamara bituwe n’abaturage batageze kuri kimwe cya kabiri cy’abatuye Isi.

Ubu busabe buje bukurikira ibyemezo bya Israel n’u Budage, byatangiye gutanga urukingo rwa gatatu ku baturage bageze mu za bukuru. U Bwongereza nabwo buri mu migambi yo gutanga urukingo rwa gatatu, mu gihe ibihugu birimo Amerika, u Bufaransa ndetse n’u Butaliyani biri gukora amagenzura yo kuzatanga urukingo rwa gatatu.

OMS itangaza ko mu gihe ibihugu bikize byatangira gutanga inkingo za gatatu, bishoboka ko ibihugu bikennye bishobora kubura inkingo burundu muri uyu mwaka.

Ku mpuzandengo, ibihugu biteye imbere bimaze gutanga inkingo 100 ku baturage 100, mu gihe ibihugu biri mu nzira y’amajyambere bimaze gutanga inkingo 1.5 ku baturage 100.

OMS yasabye ibihugu kuba bisubitse umugambi wo gutanga urukingo rwa Covid-19 nibura kugera mu mpera za Nzeri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .