Umuherwe Dassault wari Umudepite mu Bufaransa, yapfiriye mu mpanuka ya kajugujugu

Yanditswe na Ndahayo Emmanuel
Kuya 8 Werurwe 2021 saa 08:47
Yasuwe :
0 0

Mu ijoro ryakeye, Olivier Dassault wari umwe mu bakize cyane mu Bufaransa, akaba n’umudepite muri icyo gihugu kuva mu mwaka wa 2002, yaguye mu mpanuka ya kajugujugu yari imuvanye ku rugo rwe ruri mu gace ka Normandy, aho yari yagiye mu biruhuko.

Urwego rushinzwe ingendo z’indege mu Bufaransa rwatangiye iperereza ku cyateye iyi mpanuka, gusa amakuru avuga ko impanuka yabaye ubwo kajugujugu yo mu bwoko bwa AS350 Écureuil yari ibatwaye, yarimo kugerageza guhaguruka.

Perezida w’u Bufaransa, Emmanuel Macron, yavuze ko igihugu gihombye umuntu wagikundaga ndetse akacyitangira mu buryo bwinshi.

Ati “Olivier Dassault yakundaga u Bufaransa. Yari umunyenganda, akaba umudepite, yari umuyobozi mu nzego z’ibanze, yabaye mu ngabo zirwanira mu kirere; mu buzima bwe bwose, ntiyigeze ahagarika gukorera u Bufaransa no guha agaciro ibikorwa byose byabwo. Urupfu rwe rutunguranye ni igihombo gikomeye”.

BBC yatangaje ko Dassault yari kumwe n’umupiloti umwe muri kajugujugu, ndetse amakuru yemeza ko nawe yamaze kwitaba Imana.

Uyu mugabo wari ufite imyaka 69, yari umwe mu bakire bakomeye mu Bufaransa kuko abarirwa umutungo ufite agaciro ka miliyari 7,3$, akaba yari ku mwanya wa 361 ku rutonde rwa Forbes Magazine, rugaragaza abatunze agatubutse ku Isi.

Umutungo we yawukomeye mu muryango we kuko Sekuru we, Marcel Dassault, ari we washinze uruganda rwa Dassault Aviation rwakoze indege zakoreshejwe n’u Bufaransa mu ntambara ya mbere y’Isi.

Amaze kwitaba Imana mu 1986, Se wa Olivier Dassault, Serge Dassault, yamugize Umuyobozi Ushinzwe Igenamigambi muri urwo ruganda ndetse mu 2011, aza kugirwa Umuyobozi w’Inama Nkuru y’Ikigo cya Groupe Dassault kinasanganywe ibindi bikorwa bitandukanye.

Uwo mwanya ariko yaje kuwuvaho nyuma yaho gato, kugira ngo yirinde ko inyungu z’ubucuruzi bw’umuryango we zazagongana n’iza politiki yari amazemo igihe, binavugwa ko afite imigambi yo kwiyamamariza imyanya ikomeye.

Apfuye asize abana batatu.

Depite Olivier Dassault yitabye Imana ku myaka 69 / Ifoto: AFP

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .