00:00:00 IGIHE NETWORK KN KINYARWANDA EN ENGLISH FR FRANCAIS

Nyirabayazana w’amarorerwa yabereye muri Amerika yiswe ‘Watergate Scandal’ yitabye Imana

Yanditswe na Muhonzire Sylvine
Kuya 1 Mata 2021 saa 07:45
Yasuwe :
0 0

G Gordon Liddy, wamenyekanye cyane kubera kuba umwe mu bantu bateguye amarorerwa yabereye muri Leta Zunze Ubumwe za Amerika mu myaka 49 ishize yiswe ‘Watergate Scandal’ yitabye Imana ku myaka 90.

BBC yatangaje ko iby’urupfu rwe byemejwe n’umuhungu we Thomas Liddy, wirinze kugira byinshi avuga, ariko akemeza ko atishwe na Covid-19.

Liddy wabaye umusirikare, umukozi muri White House, agakora no mu ishami rishinzwe iperereza muri Amerika, FBI, yafunzwe imyaka 20 n’amezi ane ashinjwa gukora amarorerwa yabereye mu nyubako ya Watergate yakoreragamo abo mu ishyaka ry’aba-Démocrate, yatumye uwari Perezida wa Amerika icyo gihe, Richard Nixon, yegura.

We na bagenzi be baturukaga mu ishyaka ryaba- Républicain, bashyize udukoresho dufata amajwi rwihishwa muri iyo nyubako, kugira ngo bumvirize imipango yose y’abagize komite y’ishyaka ry’aba-Démocrate kuko amatora y’Umukuru w’Igihugu yari yegereje.

Nyuma byaje kumenyekana, barafungwa ariko Liddy niwe wenyine wanze kwemera icyaha ngo agisabire imbabazi, ahubwo avuga ko ibyo yakoze yakongera kubikorera perezida we bibaye ngombwa, ndetse yatwaraga imodoka yo mu bwoko bwa Rolls Royce, yanditse ngo ‘H2OGATE’ bivuze ‘Watergate’.

Amaze gufungurwa yaramenyekanye cyane birushijeho aba umwanditsi w’ibitabo, ndetse yakoraga ibiganiro kuri radio binyura benshi.

Yavukiye muri Leta ya New Jersey muri Amerika mu 1930, mu gitabo yanditse kigaruka ku buzima bwe yavuze ko akiri umwana yakundaga kumva imbwirwaruhame za Adolf Hitler.

Yari umuntu udatinya kuvuga ikimuri ku mutima n’iyo cyaba kibi ndetse ubwo yakoraga mu biro bya perezida, yasabye ko abanyapolitike b’abanzi b’igihugu bakicwa, asaba ko umunyamakuru Jack Anderson wakoraga inkuru zicukumbuye yicwa, asaba ko inyubako ya Brookings Institution yari ibitswemo amabanga y’igihugu yahishuwe n’umusirikare yaturitswa n’ibindi byinshi. Gusa ibyo byose ntibyigeze byemerwa.

G Gordon Liddy yitabye imana ku myaka 90
G Gordon Liddy ava mu rukiko, ubwo yahakanaga ko atigeze yinjira nyubako ya Watergate yakoreragamo ibiro bikuru by’aba- Démocrate
Yakoraga ibiganiro kuri Radio bikundwa na benshi
Yari umwanditsi w'ibitabo ukomeye
Yafunzwe imyaka 20 n'amezi ane ashinjwa kwinjira bucece mu nyubako ya Watergate no kumviriza aba-Democrate

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .