Nicolas Sarkozy yabaye uwahoze ari Perezida w’u Bufaransa wa mbere witabye urukiko

Yanditswe na Bukuru JC
Kuya 23 Ugushyingo 2020 saa 06:09
Yasuwe :
0 0

Nicolas Sarkozy wayoboye u Bufaransa kuri uyu wa Mbere yatangiye kuburanishwa ku byaha bya ruswa akekwaho, aba umuntu wa mbere wahoze ayoboye iki gihugu witabye urukiko akekwaho ibyaha.

Sarkozy yari mu rukiko rw’i Paris ku giti cye, gusa ntiyigeze agira icyo abwira abanyamakuru ubwo iburanisha ryari rirangiye.

Usibye Sarkozy, undi wahoze ayobora u Bufaransa wakurikiranyweho ibyaha ni Jacques Chirac gusa kubera impamvu z’uburwayi, we ntiyigeze yitaba urukiko ngo yisobanure ku byo yashinjwaga byo guhimba imirimo.

Iperereza ku byaha bya ruswa Sarkozy naryo kandi ryatumye aba uwahoze ayobora igihugu wa mbere witabye Polisi kugira ngo ahatwe ibibazo ubwo ryatangiraga mu myaka itandatu ishize.

Ashinjwa ko yagerageje guha ruswa abashinzwe inzego z’ubutabera kugira ngo baburizemo iperereza ryakorwaga ku mutungo w’ishyaka rye.

Ubwo yitabaga urukiko, iburanisha ntiryatinze kuko ritamaze iminota irenga 30 ahubwo ryahise risubikwa rikazasubukurwa ku wa Kane w’iki Cyumweru. Ryasubitswe kuko umwe mu bantu bari muri iyi dosiye, Gilbert Azibert, wahoze ari n’umunyamategeko we atari ahari ku mpamvu z’uburwayi.

Byitezwe ko uru rubanza ruzapfundikirwa ku wa 10 Ukuboza. Mu gihe Sarkozy yahamwa n’icyaha, azafungwa imyaka 10 muri gereza ndetse atange n’ihazabu ya miliyoni imwe y’ama-euro, asaga miliyari y’amafaranga y’u Rwanda.

Sarkozy ni we muntu wahoze ari Perezida w'u Bufaransa witabye Urukiko akekwaho ibyaha
Yari acungiwe umutekano ku buryo bukomeye nk'umuntu wahoze ari Perezida
Nta kintu na kimwe yigeze avuga ubwo yasohokaga mu cyumba cy'iburanisha
Mu gihe yahamwa n'ibyaha, ashobora gufungwa imyaka 10

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .