00:00:00 IGIHE NETWORK KN KINYARWANDA EN ENGLISH FR FRANCAIS

Moderna yagejeje Pfizer/BioNTech mu nkiko

Yanditswe na Umwali Zhuri
Kuya 27 August 2022 saa 12:01
Yasuwe :

Sosiyete y’Abanyamerika ikora ibikoresho byo kwa muganga, Moderna, yareze Pfizer ifatanyije na BioNTech kuri uyu wa Gatanu, iyishinja gukoresha nta burenganzira ikoranabuhanga ry’ingenzi rya mRNA mu gukora urukingo rwa Covid-19.

Mu itangazo yashyize ahagaragara, Moderna yatangaje ko idashidikanya ko urukingo rwa Covid-19 rwa Pfizer ifatanyije na BioNTech rwakozwe hifashishijwe ikoranabuhanga rya Moderna ryakozwe hagati ya 2010 na 2016.

Iri koranabuhanga ni ryo ryashingiweho mu gukora urukingo rwayo rwa Spikevax rwa Covid-19.

Pfizer/BioNTech ngo yiganye iryo koranabuhanga nta burenganzira ihawe na Moderna mu gukora urukingo rwayo rwa Covid-19.

Iri koranabuhanga Moderna ivuga ko yarishoyemo akayabo ka miliyari z’amadolari nk’uko byatangajwe n’umuyobozi wayo, Stéphane Bancel, bityo ko bagomba kuribungabunga.

Iyi sosiyete ngo yari yariyemeje kudatanga ibirego bifitanye isano no kurenga ku kutubahiriza uburenganzira ku mutungo mu bw’ubwenge kuva mu Ukwakira 2020 kubera ko icyorezo cyari gicanye maremare ariko ubu ngo ibintu byageze ku rundi rwego.

Ubuyobozi bwayo bwatangaje ko izatanga ikirego muri Leta ya Massachusetts muri Leta Zunze Ubumwe za Amerika no muri Düsseldorf mu Budage.

Icyo Moderna igamije ngo si ugusaba ko Pfizer/ BioNTech ikura urukingo rwayo ku isoko ahubwo ishaka ko ihabwa indishyi z’amafaranga by’umwihariko ku nkingo zaguzwe uhereye muri Werurwe.

Mu itangazo Pfizer/BioNTech na yo yashyize ahagaragara, yatangaje ko itari yiteze ko iki kirego cyabaho.

Iti "Pfizer/BioNTech ntirasuzuma iby’iki kirego ariko dutunguwe n’ikirego kuko urukiko rwa Pfizer/BioNTech rwa Covid-19 rwakozwe hashingiwe ku ikoranabuhanga rya mRNA ryakozwe na BioNTech ifatanyije na Pfizer. Twiteguye kuziregura ku byo twashyiriweho.”

Inkuru ya 7 sur 7 be, ivuga ko Moderna isa nk’aho ishaka gukomeza kwiharira ikoranabuhanga rishobora gufasha mu bundi buryo bwinshi aho igaragaza ko ishobora gukoresha ikoranabuhanga ryayo rishamikiye kuri mRNA hakorwa imiti ivura ibicurane, Virusi ya Sida, diabete, indwara z’umutima na kanseri.

Moderna na Pfizer/BioNTech ni byo bigo byabimburiye ibindi mu gukora inkingo za Covid-19 mu buryo bwihuse nyuma y’umwaduko w’icyo cyorezo kubera iryo koranabuhanga rya mRNA.

Gukemura ikibazo nk’iki mu nkiko ngo bishobora gufata igihe kirekire.

Pfizer/BioNTech irateganya ko urukingo rwayo ruzagurishwa agera kuri miliyari 32 z’amadolari muri uyu mwaka wa 2022.

Moderna irashinja Pfizer kwigana ikoranabuhanga ryayo mu gukora inkingo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .