Mikhail Mishustin yagizwe Minisitiri w’Intebe mushya w’u Burusiya

Yanditswe na Nkurunziza Ferdinand
Kuya 17 Mutarama 2020 saa 04:15
Yasuwe :
0 0

Nyuma yo kwegura bitunguranye kwa guverinoma yose mu gihugu cy’u Burusiya ku wa Gatatu w’iki cyumeru, umutwe w’abadepite mu Nteko Ishinga Amategeko y’iki gihugu wemeje Mikhail Mishustin nka Minisitiri w’intebe mushya.

Mbere yo kugirwa Minisitiri w’Intebe, Mikhail Mishustin yari umuyobozi w’ikigo gishinzwe imisoro mu Burusiya, aho yagaragarije ubuhanga bwe mu byerekeye ubukungu.

Mishustin azwiho kuba yaravuguruye ku buryo bwiza politiki y’imisoro muri iki gihugu, by’umwihariko kwifashisha ikoranabuhanga mu gukusanya imisoro.

Mikhail Mishustin aherutse kubwira Inteko Ishinga Amategeko y’u Burusiya ko iki gihugu kigomba kurinda ubukungu bwacyo, bugakomereza ku murongo mwiza buriho, kwiyongera kw’ibiciro ku isoko bigakomeza ku gipimo cya 4%, kandi bakarushaho gushyigikira imishinga migari ikubiye muri gahunda y’iterambere ya perezida Vladimir Putin.

Uyu mugabo wavutse mu 1966, yabanje kwiga amasomo ya [Systems Engineering], nyuma akomereza mu bukungu aho afite impamyabumenyi ebyiri z’ikirenga (PhDs).

Guverinoma y’u Burusiya yeguye nyuma y’uko Perezida Vladimir Putin asabye ko haba impinduka mu Itegeko Nshinga zishobora kumwongerera igihe azamara ku butegetsi.

Uwari Minisitiri w’intebe Dmitry Medvedev yatangaje ko ibyo perezida yasabye bizagira akamaro mu kuringaniza ubutegetsi mu Burusiya.

Putin yasabye Medvedev kuba umuyobozi wungirije w’inama y’igihugu inshinzwe umutekano.

Ibi bitangajwe mbere y’imyaka ine ngo manda ya kane ya Vladimr Putin irangire kuko yari kurangira mu 2024.

Mu Itegeko Nshinga risanzweho ntabwo Putin yemerewe kuyobora indi manda.

Mu ijambo yabwiye imitwe yombi y’Inteko Ishinga Amategeko, Vladimir Putin yavuze ko abaturage bazatorera impinduka zishobora kuvana ubutegetsi kuri perezida bugahabwa Minisitiri w’Intebe n’Inteko Ishinga Amategeko.

Bamwe bafata ubu buryo nk’umugambi mugari ugamije kwambura ububasha ushobora gusimbura Putin, nubwo hatari hamenyekana neza ikibyihishe inyuma.

Dmitry Medvedev uherutse kwegurana na guverinoma ye yose yabaye minisitiri w’intebe imyaka myinshi.

Yigeze kuba perezida w’u Burusiya hagati ya 2008 na 2012 ahinduranyije umwanya na Putin, ubwo uyu yari arangije manda ze ebyiri nka perezida.

Itegeko Nshinga ry’u Burusiya ryemerera ba perezida kutarenza manda ebyiri zikurikiranyije.

Mikhail Mishustin yagizwe Minisitiri w’Intebe mushya w’u Burusiya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza