Michelle Obama yahishuye uko inda ya mbere yavuyemo n’uburyo yifashishije ngo yongere gusama

Yanditswe na Mukaneza M.Ange
Kuya 10 Ugushyingo 2018 saa 03:03
Yasuwe :
0 0

Michelle Obama, umugore wa Barack Obama wabaye Perezida wa 44 wa Leta Zunze Ubumwe za Amerika, yagarutse ku buryo akimara gushaka yagowe no gusama nyuma y’uko inda ya mbere yivanyemo, kugeza ubwo yitabaje ikoranabuhanga.

Iyi ngingo irebena n’ingorane mu gusama ndetse n’ubugumba benshi badakunze kuvugaho, Michelle yayigarutseho cyane mu gitabo yise ‘Becoming’.

Mu myaka 20 ishize nibwo inda yari atwite yivanyemo, kugira ngo abashe gusama abakobwa be Malia na Sasha Obama akaba yarifashije ikoranabuhanga rizwi nka IVF (In Vitro Fecundation), ryifashishwa hahuzwa intanga ngabo n’intanga ngore bitabereye mu mura w’umugore.

Mu gace gato k’ikiganiro Good Morning America katambutse ku wa Gatanu kuri televiziyo ya ABC, Michelle yatangaje ko ubwo ibi byamabugaho yiyumvisemo kwiheba no kumva ko hari icyo atakoze uko bikwiye.

Ati “Ntabwo narinzi uburyo kuvamo kw’inda biba kuri benshi, kubera ko ari ingingo tutajya tuvugaho. Twicara mu bubabare bwacu, tugakomeza kwiyumvisha ko hari ibitagenda uko bikwiye.”

Michelle Obama uhamya ko adatandukanye n’abandi bagore, avuga ko ikibazo cyo kuba inda zivanamo gihari kandi gikwiye kuvugwa kugira ngo hatagira abakomeza kwicira imanza.

Ati “Ndatekereza ko ari cyo gikorwa kibi dukorerana nk’abagore, kudasangira ukuri ku mibiri yacu, uko ikora n’uko idakora.”

Muri iki kiganiro kizatambuka cyose ku Cyumweru, Michelle yanagarutse ku mbaraga nyinshi yasabwaga gukoresha aharanira ko urugo rwabo rukomeza kubaho neza, mu gihe umugabo we yari atangiye gushyira imbaraga nyinshi muri politiki.

Mu gitabo cye, Michelle yanagize icyo avuga kuri Perezida Donald Trump ahamya ko atazigera amubabarira kuba yarashyize ubuzima bw’umuryango we mu kaga.

Ni igihe mu 2011 yashyigikiraga abasabaga ko Barack Obama ashyira ku mugaragaro icyangombwa cye cy’amavuko.

Igitabo ‘Becoming’ kizajya hanze tariki ya 13 Ugushyingo 2018.

Trump nawe yahise asubiza ko atazababarira Obama kubera akangaratete yasizemo igisirikare cya Amerika, ku buryo byamusabye imbaraga mu kugisubiza ku murongo.

Yananenze Michelle ko yishyuwe amafaranga menshi ngo yandike icyo gitabo kuko ababikoze bazi ko hari byinshi bizavugwamo bibonwa kwinshi, nawe yiyemeza kuzajya abasubiza muri uwo mujyo.

Michelle Obama yahishuye ko abakobwa be yabasamye hifashishijwe ikoranabuhanga

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza